Vawiin tlai dar 4-ah campaign tawp hun

February 12-a village council leh local council inthlanpui neih turah vawiin, February 10 tlai dar 4.00 hian campaign hun a tawp dawn.
Sawi lawk tawh angin, State Election Commission emaw District Election Office emaw in a hranpaa phalna an pe a nih loh chuan, mi tumahin inthlan kaihnawiha candidate emaw political party bil sawimawina leh insawichhiatna lam chu February 10 tlai dar 4.00 hma lama an sawi ni lo, a hnulamah chuan print media, electronic media leh social media-ah sawi leh en theih tura phochhuah thar phal a ni tawh lo tih a sawi a. He thupek zawm lo chu thubuai siamsak theih niin, thiam loh an chang a nih chuan kum hnih thleng lung in tantir emaw lei chawitir emaw, a pahnih emawa hrem theih an ni tih a sawi.
Vote hi Nilaini zing dar 7.00 atanga tlai dar 4.00 thleng thlak a ni dawn a, tum danga tih loh dan deuhin SEC chuan tun tumah hian inthlan zawh hun a tawo veleha vote chhiar nghal mai loin, a inrualin February 12 zan dar 7.00 atanga vote chhiar tan turin a ti a. Tlai dar 4.00 hnu lama vote la thlak ngai an awm a nih pawhin, vote thlak zawh hun hunah zan dar 7.00 a pelh tawh chuan an polling booth-a vote tla hi an chhiar zui ve mai dawn a ni.
Hetihlai hian inthlan ngai loa chuhpuitu awm loa a in candidate chhunte tlinga puan theih an awm a. VC bikah chuhtu awm lo a tlinga puan seat 40 awmin, general seat 24 bakah hmeichhe tana hauh seat 16 ah a ni. Tlinga puan mi 40 zinga 29 chu ZPM candidate an ni a, 5 chu MNF niin, INC 4 leh independent candidate 2 an ni.