YMA hruaitu rual kalkhawmin IAF kuta airport hlan an duh lo

YMA hruaitu rual kalkhawmin
IAF kuta airport hlan an duh lo
Aizawl khawpui chhunga YMA branch hruaitu kalkhawm chuan Indian Airforce kuta Lengpui Airport hlan an remti lo tih an sawi a. Aizawl Lammual chu Assam Rifles-in an chhuahsan hunah mimal, pawl leh kohhran hminga remchang la an awm lohna turin theihtawpa hma lak an tum tih an sawi.
2024 October 24-a YMA Rorel Inkhawm vawi 4-na Aizawla a neihah “Ruihhlo do khawngah nasa zawka hma lak ni rawh se” tia a lo rel tawh angin, February 7 zan khan Central YMA buatsaih-in ruihhlo do kawnga infuihthar a ni a. Aizawl khawpui chhunga YMA Branch 109 atangin Branch hruaitute leh YMA Branch hrang hranga Kumpuan Sub-Committee mi 900 vel an kalkhawm.
Ruihhlo do lama infuihna bakah Central YMA leh NGO Coordination Committee hmalakna kalpui mek pahnihah resolution an pass.
‘Kan ram rohlu, Lengpui Airport hi Indian Air Force (IAF) kuta hlan a nih lohna tura Central YMA leh NGO Coordination Committee hmalakna hi kan thlawp a, IAF kuta Lengpui Airport hlan kan rem ti lo,’ a ti. Aizawl khawpui lailia awm Assam Rifles chhuah hunah an awmna hmun, Lammual leh a chhehvel chu mipui vantlang tana tangkai taka hman a nih theihnan leh mimal, pawl, political party leh kohhran ten remchang la lo tura Central YMA hmalakna an thlawp a; theihtawp chhuaha hmalak zel tha an ti bawk.
Ruihhlo do infuihtharnaah hian Central YMA president hlui pathum – JH Zoremthanga, Lalbiakzuala leh Vanlalruata te bakah president nilai Lalhmachhuana hnen atangin nasa zawka ruihhlo do kalpui kawnga hmalakna tur kawng hrang hrang ngaihthlak a ni a. Kal khawmte atangin zawhna awmte chhan a ni.