Opposition VC thawhpui theih loh hi ZPM ministry tawn ngei – ZPM Media G/S

Opposition VC thawhpui theih
loh hi ZPM ministry tawn ngei
– ZPM Media G/S
State sawrkar lai thawhpui tha duh lo opposition VC an awm thu chu phuahchawp ni lo, tuna ZPM sawrkarin a tawn ngei a ni tih ZPM hruaitute chuan an sawi.
ZPM Media & Publicity general secretary TBC Lalthanmawia chuan, local council / village council te chu sawrkar kutke pawimawh tak, mipui nena inngheng tlat an ni a. Veng chhung hmasawnna leh khawltang mipui hmasawnna an kutah a innghat thui hle, tiin, LC/VC nei tha veng/khua chu khaw dang leh veng dang aiin hma an sawn thin tih a sawi.
Chutih laiin LC/VC tha neih lohna hmunah chuan sawrkar hmalaknaten mipui hnen a thleng tha duh lo thin a, veng chhung hmasawnna a thuanawp thin tih sawiin, “State sawrkar leh LC/VC ten thawhhona tha tak an neih a pawimawh a, inkawp rem tak leh state sawrkar policy tuipui tur leh phur taka sawrkar hmalakna mahni venga kalpui thei tur VC/LC member kan thlan chhuah a pawimawh,” a ti
Sawrkarin theihtawp chhuahin veng leh khawtlang hmasawnna turin hma la mah se, LC/VC level-ah thlawp a hlawh loh chuan sawrkar tan a luhai thlak thin tih ZPM Media hruaitu hian a sawi a. Kum khat vel sawrkarna an chelh chhungin opposition LC/VC zingah thawhpui nuam tak, khawtlang hmangaihna leh rawngbawlna rilru pu an awm laiin, hmun thenkhatah erawh kalphung thar sawrkar rilru pu lo leh policy tuipui lo, khawtlang hmasawnna aia mahni tanghma hai leh sawrkar thawhpui tha duh lo an awm ta fo tih a sawi a ni.
“State sawrkar nena inkawp rem sa leh inzarzawm ZPM candidate-te lo thlang tling mai turin Zoram mipui kan sawm a. Min thawhpui tha duh lo LC/VC min pek chuan khawtlang mamawh leh harsatna thlen kawngah an mawng a rit ang tih pawh venthawnawm tak a ni. Kalphung thar policy tuipui ngei ZPM candidate-te, VC atan min pe theuh turin khaw tin leh veng tin mipui kan ngen a ni,” a ti.
Chief minister Pu Lalduhoma kaihhruai sawrkar chuan ram rorelna a chelh tirh atangin beihna leh sawichhiatna karah tha thlah loin ram hmasawnna hna tam tak kum khat lek chhung pawhin a thawk tawh a, hmachhawp leh hna kal mek thahnem tak a awm tih a sawi a. Corruption a tawmim ta hle, tiin, “Thluaka sum lut, tih tawngkam duhawm lo tak pawh a lo reh chho ta. Hetiang taka thil tha tih duh ministry hian sawrkar hnathawkte thawhpuina a dawn that em avangin hmalakna a kal chak viau a ni,” TBC Lalthanmawia hian a ti bawk.