VC/LC mawhphurhna leh mipui

Village Council leh Local Council inthlan chu zawhfel a ni leh ta a. Nizan zan tir lam thleng kha chuan vote tla zat hriat chian theih a la ni lova. Vote thlak theih hun tawp tlai dar 4 hnu deuha district thenkhata vote tlak dan chu 66% chunglam hret a ni a. Dar 4 hnu lama thlak tur hi engemaw zat an awm dawn a, a pumpui thua vote tlak dan hi 70% chunglam chu a nih a rinawm. Chuti a nih chuan, mipui za zela 70-in khawtlang inrelbawlna an ngai pawimawh a, za zela 30 chuan an ngai pawimawh lo, tihna te pawh a ni thei awm e.
Village Council leh Local Council-te hi ram leh hnam hmasawnna hna thawhna tura a kailawn bulthut pawimawh em em an ni a, ‘local government’ tia sawi a ni. State hmasawnna hi VC/LC te hnathawh danin a hril thui hle. Entir nan, khawtlang hmasawnna hna (kawngpui repair/tuiluankawr/step etc.) siam a ni a, a siamtu chu contractor emaw, a chang chuan party unit te emaw pawl etc. te pawh an ni maithei e. Hna thawh dan lo vil chu VC/LC mawhphurhna a ni. Contractor emaw thawktu dang pawh, an hnuhma tha lo a nih chuan, hna tha lo taka thawk theia siamtu chu hna lo viltu tura mawhphurhna nei VC/LC te kha an ni.
Hei hi entirna pakhat mai a ni. Khawtlang hmasawnna tur thildang heng – education kaihhnawih a ni emaw, hriselna lam a ni emaw, faina lam a ni emaw, ‘eng tin nge a aia tha zawkin kan kalpui ang’ tia a theih ang anga hmalak kha VC/LC mawhphurhna a ni tel vek a. Sawrkar laipui hnuaia scheme hrang hrang, state sawrkar kaltlanga thawh tur zawng zawng pawh, VC/LC kutah a hlawhtlinna a innghat thui em em a ni.
Chutiang mawhphurhna hria leh thawk thei tur chu mipuite hian kan dap khawm ve tur a ni. VC/LC huam chhunga hmasawnna zawng zawng infawkkhawm hi Mizoram hmasawnna chu a ni mai a, chu chuan VC/LC pawimawhzia chu a hril chiang mai awm e.