Apple juggling chunga keih hnem thei record siam

Apple juggling chunga keih hnem thei record siam
David Rush hming sawi tawh chuan rilruah Guinness World Records a rawn lang nghal lo thei lo, tunah pawh record a siam leh ta. Tun tum chu apple pum thum juggling chunga minute khat chhunga a apple juggling lai keih hnem thei ber record a siam a, vawi 198 a keih hman.
Rush hian apple pum thum a kut pahnih hmanga vawr kualin, engtik lai pawhin apple pakhat tal chu boruakah a awm reng tur a ni a, a kut ding leh vei lamin apple chu a in-pass kual char char tur a ni bawk. Heti chung chuan a apple vawr lai chu a dawn chiahin a keih nghal zel a, rang taka tiin, minute khat chhungin vawi 198 a keih hman a record a siam ta a ni. A hmaa hetiang record pawh ama siam tho niin, 2018 khan MIT Juggling Convention-ah minute khata a apple juggling lai vawi 164 keih hmanin record a lo siam tawh a, he record hi a rawn khum leh ta a ni.
Rush chuan, “An dan zam a khauh khawp mai a, vawi khatah lian pui a keih chi a ni lo a, rang taka keih a ngai bawk. Lemna hman a awm lo a (lem phal tho a ni), chuvangin ka chhak chhuak leh zel a ni,” a ti.