Lottery-ah nuai 1388 hmu tawh

Sawrkar kum kal mekah Mizoram sawrkar chuan lottery atangin cheng nuai 1388 chuang a hmu tawh.
Nilainia Assembly Budget Session tannaa larsap Gen. Vijay Kumar Singh (Retd) sawi danin, financial year kal mekah December 2024 thlenga Mizoram sawrkarin lottery atanga chhiah a hmuh tawh tlingkhawm chu nuai 1388.15 a ni a. Mizoram sawrkar hian online lottery system hman theih thuai tumin a inpuahchah a, hemi ah hian non-tax revenue atanga sum lut a pun phah beisei a ni.
Sawrkar kum kal mekah 2024 December thleng khan Finance department-in chhiah a lakkhawm zawng zawng belhkhawm chu cheng vaibelchhe 827.88 a ni a, financial year kal laia chhiah tlingkhawm tura bituk a khum ngei beisei a ni.
Chhiah tlingkhawm a pun lehzualna turin 2024 September 3 atang khan tuialhthei man tihpun a ni a. Heng chhiah hi ram mipui tana social infrastructure & services pekna atan bakah kawngpui siamthatna atan chauha hman tura ruahman a ni tih larsap hian a sawi.
“Sawrkarin pensioner-te hamthatna a ngaipawimawh hle a. Tun financial year chhung hian pension chi hrang hrang – superannuation /voluntary/ invalid/ compulsory removal /family pension leh pensioner boralsan tak chhungte kaihhnawih case 1889 chuang dawngin, heng zinga case 1744 chu chinfel a ni tawh,” a ti.