Damdawi inah Gandhi-i dah lut

Damdawi inah Gandhi-i dah lut
Congress hruaitu leh Rajya Sabha MP, Sonia Gandhi-i chu Ningani tuk khan a pum nawm loh avangin Delhi-a Sir Ganga Ram Hospital-ah dah luh a ni tih damdawi inin a sawi a, natna khirh leh ngaihtuahawm erawh a ni lo tih an sawi.
Gandhi-i hi Zirtawpni khan chhuah lehnghal a ni.
Sir Ganga Ram Hospital Board of Management Chairman Dr Ajay Swaroop chuan Gandhi-i hi damdawi ina a awm chhungin gastroenterology specialist Dr Samiran Nundy-a’n a enkawl thu a sawi.
Congress president hlui, Gandhi-i hian nikum Devember thla khan kum 78 a tling.
Vantlanga Gandhi-i a inlan hnuhnung ber chu kar hmasa, February 13-a Rajya Sabha-a budget session-ah khan a ni.
Hemi hma, February 10 khan Gandhi-i hian sorkar laipui chu a hma thei ang bera chhiarpui ti zo thuai turin a ti a, India-a cheng mi tluklehdingawn 14 vel zingah chhiarpui neih hnuhnung bera mihring zat anga thil kalpui thin a nih avangin food security law-in a huam loh an tam phah niin a sawi a ni.
Rajya Sabha-a Zero Hour-ah Gandhi-i hian National Food Security Act (NFSA) chu chhiarpui neih hnuhnung ber, 2011-a mi ang daiha kalpui a la nih avangin tunah mihring cheng zat an pung nasa tawh si a, a zat dik hriat a ngai hmanhmawh niin a sawi a ni.
Gandhi-i hian NFSA hi UPA sorkarin September, 2013 atanga a kalpui kha niin ram chhunga mihring veibelchhe 140-te hnenah ei tur kham pekna tura duan a nih thu as awi bawk.
Prime minister hlui, Rajiv Gandhi-a thihsan, Rahul leh Priyanka Gandhi Vadra-i te nu ni bawk hi a kum a tam ve deuh tawh avangin taksa lama insawiselna a nei ve zeuh zeuh tawh a, nikumah pawh damdawi in luh a nei fo tawh a ni.