Sawhthing kg nuai 13 lei tawh

Mizoram sorkarin February ni 20-ah sawhthing a lei tan a, kg nuai 13 a lei tawh.
Mizoram Agriculture Marketing Board (MAMB) atanga thu dawn danin, Kg 1 man Rs 50-a chhutin sawhthing hi cheng nuai 650 man lei a ni tawh.
Sawhthing lei tawh phurh chhuah nana truck hman man leh thil dang neuh neuhah sum tam tham tak hman a ni tawh tih an sawi.
Sawhthing leina man hi ni sarih chhungin a neitute hnenah pek zel an tum thu MAMB hotute chuan an sawi a, district marketing Committee atangin loneitute hnenah direct beneficiary transfer (DBT) hmanga pek chhuah tur a nih thu an sawi.
District thenkhatah chuan sawhthing man hi a neitute’n an dawng tan tawh a, la dawng lote pawhin an dawng thuai turah an ngai tih sawiin, district-ah hian sawhthing leina tur sum dah lawk a nih thu an sawi bawk.
Sawhthing lei hi a thawh khatna atan an duhtawk tan a, Secondary Collection Centre tam zawk chuan sawhthing lei hi an chawl lailawk rih; hmun thenkhatah erawh Sawhthing hi an la lei.
Sorkarin sawhthing a lei hi Thawhlehni khan an lilam tan a, Thawhlehni khan mi pangain an chhang tawh. Sawhthing lilamnaah hian reserve price siam a ni a, a chhang huai huai hnenah sawhthing hi hralh tura ruahman a ni.