Israel-in mi tang a chhuah loh chuan inkahhai zui tum lo

Israel-in mi tang a chhuah loh chuan inkahhai zui tum lo
Hamas chuan Israel nena Gaza-a inkahhai an puan mek chu kalpui zui zel turin Palestinian mi tangte chhuah an nih phawt loh chuan kalpui zui a harsa dawn tih an sawi.
Israel hian Pathianni khan an lung ina Palestinian an tantir mi 600 chuang chu Hamas-in Israeli an hren dam lai paruk leh thi tawh pali an chhuah ruala chhuah ve tur ni mah se an chhuah ve dawn lo tih ans awi a, Hamas hian an mi hren an chhuahah hian inkahhai thuthlung bawhchhiain mihring tih dan phung lo takin an chungah an ti niin a puh.
Hamas hotu sang pakhat chuan an inremna pum chu ‘a derthawng’ tih sawiin an kara palai hna thawk, a bikin US chu Israel nawr turin a ti.
Inkahhai puan mek thawh khatna, chawlhkar ruk awh tur hi Inrinni hian a tawp tawh dawn a, a thawh hnihna atan inbiakna kalpui leh tan tawh ni mah se indona tihtawp tak takna tur a la awm lo.
UN Secretary General António Guterres chuan inkahhai chu a derthawng tih sawiin chhiatna lian tak a thlen zui lohna tur ti hram hram turin a ngen a. Mi hrente chu chhuah vek turin a ngen bawk.
Inrinniah khan inkahhai thawh khatnaa a hnuhnung ber turin Hamas-in Israeli an hren dam lai paruk an chhuah tawh.
Inrinnia chhuahte rual hian Israel hian Palestinian mi tang 620 an chhuah ve tur a ni a. Mi 400 chuang chu Gazan niin indo chhunga Israeli sipaiten an man a ni a, 50 chu Israeli lung ina dam chhung tang tura tih an ni.
Chhuah turin West Bank-a lung inah bus-ah an chuang vek tawh a, Netanyahu-a’n a minister-te a rawn hnuah chhuah thulh leh an ni.
Pathianni hma takah khan prime minister pisa chuan ‘Hamas-in inkahhai bawhchhiain an mi hrente lakah mihring tih phung lo taka an chet leh avangin’ Israel-in a chhuah ve tur a tikhawtlai tih a puang zui.
“Heng mite hi mi hren dang chhuah leh hma chu chhuah an ni dawn lo va, tih dan pangngai taka chhuah an ni bawk tur a ni,” a ti.
Israel, US, UK leh ram dang tam takin firfiak pawla a puan Hamas erawh chuan Israel thutlukna chu ‘inkahhai bawhchhiatna chiang tak’ tia sawiin US, Qatari leh Egyptian palaite hnenah chhuah an nih hma chu inkahhai zel tura inbiak a theih dawn loh tih an hrilh.
“Chiang takin palaite hnenah hian Palestinian 620-te chhuah an nih loh chuan inbiak a nih tawh loh tur thu kan hrilh,” tiin Hamas political bureau member Basem Naim chuan Thawhtannia Al Jazeera-in an kawmnaah a sawi.
Ningania Israeli an hren zinga mi ruang pali hlan tur chu an kaltlangpui dawn tho em tih zawhna erawh ‘tih dan tur hrang hrang ngaihtuah mek a ni’ tiin a chhang.
“Rahbi thar kan kai leh hmain a hma lam hi kan tifel hmasa zel tur a ni,” a ti.
Naim-a hian Hamas-in an mi hren an chhuah dawna an tih dan Israel-in a sawisel pawh chhangin Israeli thuneitute pawhin Palestinian mi tangte chu an chhuah hmain an tih dan a dik lo hle zawk niin a sawi bawk.
White House chuan Israel thutlukna hi tha a ti a, mi hren chhuahte chu ‘rawng taka tih’ an ni tih sawiin a chhan letna tha tak a nih thu a sawi.
Hetih mek mek lai hian President Donald Trump-a Middle East envoy, Steve Witkoff chuan tun karah helai hi tlawhin ‘inkahhai thawh khatna pawh sei’ dan a dap dawn.
Thawh khatna chhung hian Israeli mi hren 33 leh Palestinian lung in tang 1,900 chuang chhuah tura inrem a ni.
January 19 atanga inkahhai tanah mi hren dam lai 25 leh thi tawh pali chhuah an ni tawh a, thi tawh dang pali chu tun kara Israel kuta hlan leh tur a ni a. Inremna piah lamah Thai mi hren panga chhuah an ni bawk.
Inkahhai thawh khatna chhungin Israeli sipaiten Gaza-a mihring chen tamna lai an chhuahsan dawn a. Palestinian vaivai sang tam takin hmar lama an in pan lehin ni tin tanpuina phur lirthei a lut bawk ang tih a ni.
Thawh hnihnaah mi hren dang chhuah chhunzawm an ni ang a, Israeli-te inhnukdawk fai vekin inkahhai tak tak a awm zui ang.
Israeli sipaite hian Hamas-in October 7, 2023-a an ram beia mi 1,200 chuang an thah leh hren tura mi 251 an hruai phuba lain an bei let.
Indona avang hian Gaza-a Hamas enkawl health ministry chuan mi 48,346 an thi tawh niin a sawi.
Gaza-a cheng tam zawk baihvaiin an awm a, in ding 70% vel chhiain damdawi in, tui lakna, thli paihna a chhe deuh vek a. Ei leh in, tuialhthei, damdawi leh awmna tur a vâng hle bawk.