Sorkarin hmunphiah la lei lo

Sorkarin hmunphiah la lei lo
Hmunphiah man a tlawm avangin hmunphiah neitute an mangang a, tlawm tak taka an hralh a ngai. Vawiin thlengin sorkarin hmunphiah hi a la lei lo tih thu dawn a ni.
February ni 21 khan Budget Session-ah chief minister Lalduhoma’n sorkarin hmunphiah a lei vek dawn tih a sawi a, hmunphiah tamna Vairengte leh a chhehvel leh Tlabung leh a chhehvelah tun thlengin sorkarin hmunphiah hi a la lei lo tih thu dawn a ni.
Hmunphiah hi February thla laihawlah an kek zo tawh thin a, chief minister-in sorkarin hmunphiah a lei vek dawn tih a sawi khan a keh hun a tawp tawh. March thla tir lamah pawh sorkar hian a la lei lo a, lei dawn ta se a par tawh a, a rah tawh bawk avangin han keh thar tur a awm tawh lo ang tih chu a hmun neitute sawi dan a ni.
Sorkarin hmunphiah ro kg-ah Rs 100 man tur tiin bituk mah se Tlabung leh a chhehvel khuate chuan Rs 67 te’n an hralh a, a hnuah phei chuan Rs 45 man te a ni.
“A man tlawm mah se hralh hrim hrim kan mamawh a, a leitute’n an ngam ang zatin a man an chhiar a ni ber a, awmzia a awm pha lo tih hre chunga kan hralh a ngai a,” tiin Tlabung-a hmunphiah hmun neitu pakhat chuan The Aizawl Post a hrilh.
Tlabung-a hmunphiah thartu pakhat dang chuan hralh bang quintal 6 a la kawl thu leh a manganthlak thu a sawi a, “A man tlawma hralhna tur pawh kan hmu lo a nih ber hi,” a ti.
Tlabung leh a chhehvel khuate hian hmunphiah hi an thar hnem a, nikum atang khan a man a tlawm avangin harsatna an tawk. A hma chuan a ro hi kg-ah Rs 100-in a leitute’n an tan a, chuta tang chuan a man hi a pung thin.
Vairengte leh a chhehvel khuate pawhin hmunphiah hralhnaah harsatna an tawk a, tlawm takin kuminah an hralh. Sorkarin an hmunphiah a la lei lo tih an sawi.
Anni hian a hringin an hralh thin a, sorkarin a ro man tur Rs 100 tia a bituk atang khan a hring man a tlahniam an ti. A rova hralh pawh an awm tho a, kuminah a ro second class kg-ah Rs 75, first class Rs 80 te’n an hralh. Kum dangah chuan a ro hi Rs 150 te, Rs 160 te’n an hralh thin a, nikum atangin a man hi a tlawm tih an sawi.
A hring chu kg-ah Rs 15 te’n an hralh a, chumi hnuah Rs 13 te a ni. A to ber laiin Rs 30 a ni. Kum dangah chuan a hring hi Kg-ah Rs 40 te’n an tan a, a leitute’n an inlan a, Rs 50-ah te, Rs 60-ah te a kai thin an ti.
Vairengte leh Tlabung vela hmunphiah hmun neitute chuan hmunphiah hi January thla laihawl atanga February thla laihawl thlenga an seng thin thu an sawi a, tunah chuan a seng hun a tawp tawh a, hralh tur an neih pawh an keh sa te a nih thu an sawi. A man a tlawm avanga la keh loh te pawh a awm thu leh, chung chu sorkarin a lei a nih chuan an lawm tur thu te an sawi bawk.