France team-ah Mbappe kirleh
Nations League quarter-final match-a Croatia hmachhawn tur France national team squad thar tarchhuah takah nikum September thla hnu lama a vawikhatna atan Kylian Mbappe chuan captain ni chungin khelmualah Les Blues a chhuahpui leh dawn a, karleh Ningani zan Nations League quarter-final match-ah Croatia an hmachhawn ang.
Thla ruk zet ram tana a khelh tawh loh hnuah Real Madrid striker Mbappe hi tunkar Ningani khan France head coach Didier Deschamps chuan a squad-ah kokirin, Nikum July thlaa Spanish giants a zawm hnu khan nikum October leh November thla Nations League fixture-ah France tan a inlan lo a, an captain tel loin quarter-final an thleng a, Spain leilungah a ropuina a lantir vung chhoh leh hnuah kum 26 mi chu ram tana khel turin squad-a sengluh a ni leh ta a ni.
Mbappe hian ram tan game 86 khel tling tawhin, karleh March ni 20, Ningani zan first leg-ah France hian Split khawpuiah Croatia an luhkhung phawt ang a, March ni 23 return leg chu Stade de France lama khelh tur a ni thung.
Thla ruk zet national team atanga a kalbo hnua squad a luahkir leh hnu hian captain banhren a hreng zui leh ang em tih zawhna a lian nghal a, he boruak hi Deschamps chuan zapdai nghal vatin, “Ka bia a, amh nen captain chungchang kan sawidun a, kan hmabak game hnihah hian a captain leh dawn e,” tiin a nemnghet.
Tarlan tak angin, 2018 World Cup winner hian nikum November thla khan Nations League match-a Israel leh Italy an hmachhawn tumin a khel ve lo a, khatih lai kha rilru leh taksa lama harsatna a tawh lai a nih thu Deschamps chuan sawiin, a captain tan chawlhhahdam rih kha kawng tha ber niin a sawi.
Les Bleus tana a inlan hnuhnunber chu nikum September ni 9 Nations League match-a Belgium an hmachhawn daih tawh kha a ni.
2022 World Cup final-a hat-trick siamtu Mbappe hian ram tan goal 48 thun tling tawhin, France all-time scoring list-ah pathumna a ni mek a, ram tana goal khung kawnga a tluk loh awmchhun pahnihte chu Thierry Henry (51) leh Olivier Giroud (57)-te an ni.
Nikum December thla khan Sweden khawpui Stockholm hotel pakhata inpawngsualna thlengah an hnuklut ve a, chhuichian zingah tel mah se amah chuan a pha hul a, dawta puhna mai nia sawiin, a thubuai pawh hi a zuzi ta nia hriat a ni.
-- Advertisement --
France squad
Goalkeepers: Mike Maignan (AC Milan), Lucas Chevalier (Lille), Brice Samba (Rennes)
Defenders: Jonathan Clauss (Nice), Jules Koundé (FC Barcelona), William Saliba (Arsenal), Ibrahima Konaté (Liverpool), Dayot Upamecano (Bayern Munich), Benjamin Pavard (Internazionale), Theo Hernández (AC Milan), Lucas Digne (Aston Villa)
Midfielders: Eduardo Camavinga (Real Madrid), Aurélien Tchouaméni (Real Madrid), Matteo Guendouzi (Lazio), Manu Koné (AS Roma), Adrien Rabiot (Marseille), Warren Zaïre-Emery (Paris Saint-Germain)
Forwards: Désiré Doué (PSG), Bradley Barcola (PSG), Ousmane Dembélé (PSG), Kylian Mbappé (Real Madrid), Randal Kolo Muani (Juventus), Michael Olise (Bayern Munich), Marcus Thuram (Inter Milan)