Official-in AR insawnna tur puang Mizo mipui ka lawmpui – Union HM

Sector 23 HQ Assam Rifles Khatla-ah Aizawl khawpui laili atanga Zokhawsanga Assam Rifles sawn pheina official function buatsaih a ni a. Union Home minister Amit Shah chuan a rawn telpui.
Union Home minister chuan, kum 35 vel hnu ah Mizo mipui duhdanin Aizawl khawpui laili atangin Zokhawsanga Assam Rifles sawn chhuah chu an tihlawhtling dawn ta tih a sawi a. He hmalakna hi Assam Rifles camp sawnna a ni satliah loa, Aizawl nuam zawk a awm theihnana hmalakna a ni, tiin, “Mizoram mipui ka lawmpui a, tangkai taka in hman ka duhsak che u a ni,” a ti.
He hmalakna hi kum1890-a Aizawla sipai an awm tirh atanga vawiin inkara Aizawl hmasawnna tura thutlukna chhinchhiah tlak ber tlinga a rin thu sawiin, “Hei hian Prime minister Narendra Modi kaihhruai sawrkarin Mizo mipui duh dan a ngaihpawimawh zia leh in tana a inhawn zia a tilang a. A taka a hlawhtlin theihnana theihtawp chhuaha hma latu chief minister Pu Lalduhoma leh Assam Rifles director general Lt. Gen Vikas Lakhera chungah ka lawm hle a ni,” a ti.
Sawrkar laipuiin Mizoram hmasawnna tura hma a lakna langsar tak tak – Vairengte to Aizawl kawngpui four lane siam mek, Aizawl to Tuipang double lane-a sial mek, Sairanga rel station buatsaih mek a nih dan leh Mizorama sawrkar laipui hmalakna dang Amit Shah hian a sawi a ni.
Chief minister Lalduhoma chuan khawpui laili atanga Assam Rifles sawn chhuah an nih theihnana hma a lakna avangin Union Home minister chungah lawmthu a sawi a. A thil tih chu Mizo mipui thinlunga cham reng tawh tur hmalakna ropui a ni, tiin, inpawh tlang taka inbia in, engkimah a indawrpui thin avangin Assam Rifles DG bakah Union Home secretary Govind Mohan leh Intelligence Bureau director Tapan Deka chungah lawmthu a sawi tih a sawi a ni.
“Mizoram chu tlangram a ni a, kan khawpui Aizawl hi a thang chakin mipui kan pung chak si a, vantlang hmun indaihlohna leh infrastructure lam indaihlohna a nasa hle a. Chuvangin khawpui laili taka awm Assam Rifles hi hmun dangah suan mai nise tih hi mipui thinlungah hun rei tak a lo awm tawh. Assam Rifle ngaih theih lohna emaw duh lohna emaw vanga he ngaihtuahna hi awm a ni loa, hma sawn zel tura kan mamawhna vanga lo awm zawk a ni. Khawpui lailai atanga an insawn avang hian Assam Rifles hi kan thlahthlam dawn loa, tha taka thawk hoa, a tulna apianga ram tana thawhpui turin kan inpeih reng a ni,” a ti.
GAD Mizoram commissioner Vanlaldina Fanai leh Assam Rifles DG Lt. Gen Vikas Lakhera ten map an inhlantawn a . Zokhawsanga AR awmna hmun thar map a hlan a. Lt. Gen Vikas Lakhera hian an awmna hmun, Mizoram sawrkar hnena an hlan tur map a hlan ve thung.
2024 October 23 zan dar 7.00 khan New Delhi Mizoram House-ah Assam Rifles leh Mizoram sawrkarin Zokhawsanga Assam Rifles insawnna tur inremna (MoU) an ziak fel a. An ram inhlan tur chin leh a tahtawla an inhlan dan tur pawh hemi tum hian tih chian nghal a ni.
Mizoram sawrkar leh AR MoU siam ang chuan:
8 Inremna ziah (23.10.2024) atanga thla thum chhungin AR-in an luah – Chite lui chhehvel (Dhobi Nallah) acres 62.8, AR biak in leh a bul vel ram acre 0.63 leh Babutlang ram leh an bungrua acre 0.453 a zau chu chhuahsanin Mizoram sawrkar kutah an hlan ang.
8 AR school chu academic session kal mek a nih avangin, 2025 April ralhma in an chhuahsan ve thung anga, hetah hian a chhehvel ram – Lammual area (Main Barrack Complex, Unit Hospital leh Lammual) acres 25.94, Loch House (land & building) acre 1.1, Quarter Guard Hill Complex acres 14.5, school area acre 1, War Memorial & Mandir acre 0.78 a tel dawn a ni.
8 Assam Rifles-in an luah, Khatla-a HQ 23 Sector Mizoram chin zawng leh Raj Bhavan chhim lam gate chhaka Assam Rifles DIG chenna atana hman mek chu an chhuahsan ve dawn lo a ni.
8 Mizoram sawrkarin Assam Rifles building luah lai, inremna anga hlan tur hi a man (depreciated cost) chu 2025 April ralhma in Assam Rifles a pe anga, Assam Rifles-in Mizoram sawrkar hnena a hlan ram leh building hi ‘Mizoram (Restriction on Use of Transferred Land) Act 2022’ sawi angin, mipui tana hman (reserve) tur a ni ang. (April 2025 tih chhan hi, sawrkar pawhin Zokhawsanga a tih tur la zawh fel loh a nei tho a, loneitute fehna kawng chungchang pawh chinfel ngai a la awm vangin, hemi chhung hian sawrkarin a tih tur ang ang chu ti zo hman turah an inngai a ni)