Hrisel nan iskut

Hrisel nan iskut
Kan ramin thlai thar lama kan intodelhna tlemte zinga pakhat chu iskut hi a ni ngei ang. State dang te nena khaikhin chuan kan ramah hian a man pawh a tlawm viau a ni awm e. Kan thar chhuah tam vang nge ni, ngaihsanna chang kan hre vak lo ni te hian a lang deuh roh! He thlai hi a rah kan ei a, a hnah kan ei a, a bul thlengin kan ei vek. Thlai hrisel tak a lo ni lehnghal a, a thatna hrang hrang ni a mithiam te sawi kan rawn tarlang e.
Iskut pumkhatah hian nilenga mipakhatin dietary fiber a mamawh zat atanga 14% a awm a, chu chuan cholesterol tihniamin, diabetes tan blood sugar a control thei. Fiber a pai hnem avangin chaw paitawih lamah a tanpui a, ek khal tih vel a veng thei.
Iskut pumkhatah hian 189 mcg of folate a awm a, chu chu mipakhatin nilenga a mamawh atanga 50% vel a ni. Folate chu lung (heart) hrisel nan a pawimawh hle a, nu naupai lai tan a pawimawh lehzual.
Potassium pawh a pai hnem hle a, iskut gram 200-ah potassium 254mcg vel awm anga chhut a ni a, potassium chu lung hrisel nan a pawimawh a, thluaka thisenzam chat/block (stroke) risk a tihniam a, BP sang tur pawh a beng thei.
Iskut-ah hian sodium a tlem hle a, gram 200-ah sodium 4mg vel lek awm ang a ni a, chuvangin kal (kidney) leh lung lam fel lo leh BP sang nei te tan ngaitha takin a ei ngam.
Iskut chuan zinc pawh a pai hnem hle a, chu chuan kan taksain natna a dolet theih a tichak thei. Copper pawh a pai hnem a, chu chu thyroid tan a tha hle. Vitamin B6 pawh a pai hnem a, chu chuan thil hriatreng theihna lamah a tichak a, kum upa lam leh Alzheimer emaw dementia emaw natna nei tan chaw tha tak a ni.
Vitamin K pawh a pai hnem a, chu chuan oeteoporosis risk a tihniam a, a iron pai chu thisen siamtu tha tak a ni bawk. Vitamin C pawh a pai hnem hle a, chu chu antioxidant niin, kan taksain natna a do let theihna a tichak a, cancer insiam tur a veng thei a, cell chhe tur timuangin, kan lang upa hma tur a veng thei. Iskut chansawm no khatah vitamin C 20mg awm anga chhut a ni a, chu chu nilenga mipakhatin vitamin C a mamawh zat hmun thuma thena hmun khat ang vel a ni.
Iskut chuan flavonoid a pai hnem hle a, a hnah leh zung thlengin flavonoids hi an pai vek. Chhumhmin hnuah pawh flavonoids chu an la active tho a, ril te (small intestine)-ah betin inflammation a veng thei. Flavonoids chu antioxidant niin kan taksaa free radicals-in cell a tichhe tur a veng a, cancer insiam tur vengtu tha tak a ni a, vun tan pawh a tha hle a, ruhseh nei tan pawh a tha hle.
Tunhnaia zirchianna an neiah iskut hnah atanga herbal tea an siam chuan BP sang a tihniam theih bakah kala lungte awm (kidney stone) a tikehsawm thei niin an sawi bawk.