Manipur-a chi leh chi buaina YMA leh MZP-in tha an ti lo
Tunhnaia Manipura Zofa – Hmar leh Paite inkarah inhriatthiamlohna lo thleng, tharum thawhna thleng hial chu tha an tih loh thu Central YMA leh Mizo Zirlai Pawl chuan an sawi.
Central YMA hruaitute chuan Nilaini khan Hmar Inpui hruaitute an kawm hnu ah Paite zirlai pawl – Siamsin Pawl Pi (SSPP) hruaitute an kawm leh a. Manipur-a Zofa unau kara inhriatthiamlohna lo thleng chu Central YMA chuan pawi a ti a, inremna a awm thuai theihnan hma la turin Churachandpur district-a hnam pual hruaitute a ngen tih a sawi. Hemi in a nghawng, Songtal district-a mipui veivakte tan himlo anga sawi a awm avangin Mizoram lama tangkhang awm pawh tha taka kaltlang tir leh an nih avangin Central YMA chuan Zomi Revolutionary Army chungah a lawmutih a sawi a ni.
Central YMA chuan Hmar Inpui leh SSPP hruaitute hi Churachandpur tualchhung buaina in Mizoramah nghawng a neih lohna tura theihtawp chhuaha hma la turin a ngen a. Central YMA pawhin a theih ang angin hma a la a, remna leh muanna a awm theihnan hma a la zel dawn tih a sawi a ni. ‘Mizoramah tumahin chi bing zawnga boruak siam lo tur leh tan la lo turin kan ngen a. Mizo hnam inpumkhatna tura theihtawp chhuaha tan la turin mipui kan ngen a ni,’ an thuchhuak chuan a ti.
MZP Gen. Hqrs. pawhin Manipur Zofaten hmelma thuhmun an neih lai leh, rorelna hrang (separate administration) nei tura hma an lak mek lai a, Hmar leh Zomi inkara buaina nasa tak chhuak chu pawi a tiin, vanduaithlâk a ti a. Dawhkan pakhat kila inremna thu sawi thuai turin Zomi leh Hmar hruaitute a ngen tih a sawi.
‘Zofa leh Zofa inkara buaina leh thisen inchhuahna hi engtik lai mahin MZP chuan tha a ti ngai loa, pawmzam harsa a ti hle. Hetiang buaina hian eng thil tha mah a thlen loh avangin, inphah hniam a, remna thu sawiho thuai turin kan ngen a ni,’ a ti.
Hun lokal zel turah Zofate chu chengho kan nih avangin, tute pawh thu inbahsual theih a ni a. Hetiang a awm pawhin a hnam anga buaina kalpui leh tipunlun zawng ni loin, chinfel thuai dan ngaihtuah turin Zofa hnam hrang hrang hruaitute a ngen tih MZP hian a sawi a ni.