Budget Session-ah thu inkalh

Budget Session neih mekah thu inkalh lian deuh mai a awm a, Lengpui Airport chungchangah ni thuhmunah thu inkalh a awm.
March ni 18 khan ziaka chhanna chi zawhna pakhatah Indian Air Force (IAF) hnena Lengpui Airport hlan tumna a awm lo tia chhan a ni a, hemi ni vek hian House-ah Council of Ministers-in IAF hnena hlan an lo rel tawh thu tarlan a ni.
Mamit bialtu H Lalzirliana zawhna, ziaka chhan chi, ‘Mizoram sorkar hian Lengpui Airport hi IAF te kutah hlan tumna a awm em?’ tih chhangin GAD changtu Lalduhoma, chief minister-in “Hlan tumna a awm lo va, joint user airport anga kalpui tura zir chian mek a ni,” a ti.
Hemi ni vek hian chief minister hian Hachhek bialtu Robert Romawia Royte zawhna, ziaka chhan chi a chhang a, chutah chuan council of ministers thurel, IAF hnena Lengpui Airport hlan tumna chungchang hi a lang a ni.
Hachhek bialtu hian sorkar thar pian hnua cabinet meeting an thut tawh zat leh an thurelte a zawt a, chief minister hian political & cabinet department changtu a nihnain a chhang a ni. Vawi 11 an thutkhawm tawh thu a sawi a, an thurelte a sawi bawk.
A chhannaa a lan danin, October ni 16, 2024-a council of ministers an thutkhawmin IAF hnena Lengpui Aiport hlan dan tur chungchang chu working committee-in lo bawhzui zel se tiin an rel a ni. “It was decided that the feasibility of handling over of Lengpui Aiport to IAF may be further explored by the working committee,” tiin an minute a ni.
October ni 16, 2024-a an thurel hi a hmain RTI hmanga zawttu hnenah an chhan theih loh thuin thuneitu lamin an lo chhang tawh a, “Council of ministers meeting minute hi ni 16.10.2024-a neih hi section 8(1)(i) of RTI Act, 2005-in a sawi angin pek chhuah a rem rih lo a ni,” tiin February ni 25, 2005 khan an chhang. Assembly zawhna leh chhannaa a lan hnuah a diltu hnenah hian thuneitute’n an pek tur thu an hrilh leh tih thu dawn a ni.
Sorkar thu leh hla puang thintu department DIPR pawhin October ni 16, 2024-a council of ministers thurel hi an website-ah an dah lo.