Inkalpawhna kawngpui tha tawk lo hi a veiawm – Chief secretary

Inkalpawhna kawngpui
tha tawk lo hi a veiawm
– Chief secretary
Chief secretary Khilli Ram Meena chuan inkalpawhna kawngpui tha tawk lo chu veiawm a tih thu a sawi.
Ningani khan chief secretary hian Lawngtlai tlawhin district-a sawrkar department hotute nen an thukhawm. Inkalpawhna kawng tha tawk lo veiawm a tih thu sawiin, kawng siam hnathawktu leh enkawltute chu tan la thar turin a chah. A bikin Lawngtlai to Zorinpui chu a pawimawh zual hle tiin, a enkawl kawngah chak zawka hma la tura PWD a chah.
Mizoram chu zaa za ziak leh chhiar thiamna state ni mai thei tura a din mek laiin, Lawngtlai district ‘literacy rate’ a la hniam hle chu veiawm a tih thu a sawi a. Zirthiamna kawngah hmasawnna a taka hmuh a nih neih theihnan Education department chu chak zawka hma la tur leh, a bikin elementary education ngaihpawimawh zual turin a chah.
Patanjali Foods Limited-in Lawngtlaiah oil palm extraction centre an din thuai dawn tih chief secretary hian a sawi a. Oil palm tharchhuah lamah tan lak a tul a. Chumi atan chuan inkalpawhna kawng tha neih a tul dawn tih a sawi a ni.
Thalaite tan ‘skill development’ lamah training tha tak pek a tul, tiin, entrepreneur tam zawk neih kawngah leh an thil siamchhuah hralhna tur ‘market’ ngaituah sak kawngah district administration chu theihtawp chhuah turin a chah. Free Movement Regime chungchangah dan ang taka hma lak a nih theihnan BSF, Assam Rifles leh district administration chu thawkho thiam turin a hrilh bawk.
Lawngtlai bawrhsap Cheemala Siva Gopal Reddy chuan an district dinhmun tlangpui, administration kalpui dan, deparment hrang hrang hmalakna leh hmasawnna kawnga hmachhawp a sawizau a. SP Lokeshwaran R chuan Police department hnathawh leh hmalakna, dan leh thupek kenkawh dan leh harsatna an neih a sawi a ni.