Kut tuar leh pawngsual tawkte sawrkarin zangnadawmna a pe

Kut tuar leh pawngsual tawkte
sawrkarin zangnadawmna a pe
Mi kut tuar avanga nunna chan leh kum tling lo pawngsual tawkte hnena sawrkarin zangnadawmna a pek thinah Inrinni khan mi 14 hnenah hlan a ni.
Aizawl District Court-ah ‘victim of crime compensation’ semna inkhawm hi hman a ni a. Mi kut tuar avanga nunna chan leh kum tlinglo pawngsual tawk mi 14 hnenah zangnadawmna a vaiin cheng nuai 41 sem chhuah a ni.
Aizawl District Legal Services Authority chairman, District & Sessions judge Aizawl Helen Dawngliani chuan, hetiang hun hi hman loh theih nise tih chu an duh ber a ni a, mi pawikhawihna avanga hman a ngai thin chu a pawi takzet tih a sawi. “A tuartu kan lo nih takah chuan, hetiang kan sem hi sawrkar hian kan tana tha turin heng thil hi a ti a ni tih hrerengin, kan sum dawn hi chhungkua emaw mimal emaw kan dam khawchhuahna atan, nunphung pangngai kan lo zawh leh theihnan tangkai taka kan hman hi kan tih tur leh chu chu sawrkar pawhin a phut a ni tih hrereng ang u,” a ti.
Zangnadawmna hlan a nih hnuah a tuartu chhungte atangin thusawi ngaihthlak a ni a. Aizawl District Legal Services Auhtority secretary, chief judicial magistrate Lalrochami Ralte chuan tuartute chu an sum dawn te diklo taka hmansual theih a nih avangin fimkhur a ngai, tiin a chah a ni.