Young Indians intawhkhawm Aizawlah

Young Indians intawhkhawm Aizawlah
Confederation of Indian Industry (CII) hnuaia thalaite huikhawmtu peng – Young Indians North East Regional Council Meeting (RCM) chu Inrinni khan Aizawlah neih a ni a. Labour, Employment, Skill Development & Entrepreneurship minister Lalnghinglova Hmar chuan a hmanpui. RCM-ah hian hmarchhak state hrang hranga Young Indians Chapter hruaitu engemawzat an tel.
Young Indians chu thalaite huikhawmtu, pawl tangkai leh kawng hrang hrang, a bikin sumdawnna leh entrepreneurship lamah thalaite kawng kawhhmuhtu a ni tih LESDE minister hian a sawi a. Young Indians thil tum leh hmalakna chu Mizoram sawrkarin thalaite tana hna a thawh tum dan nen a inmilh hle, tiin, hmarchhak state hrang hrang atanga thalai hruaitu kalkhawmte chu an khawtlang leh state theuh hmasawnna atan ke pen zel a, hmahruaitu ni turin a chah. “Young Indians hmalakna pawimawh tak pakhat chu ram chhung thalaite tan inhriattawnna leh inpawhtawnna networking opportunities rem siamsak a ni,” a ti.
Mizo thalaite thiamna leh talent neih hrang hrang sawiin, thalaite them thiam hrang hrang an neih leh zir theihnan leh sumdawnna an tan theihnana hma lakpui chu sawrkar ngaihpawimawh a nih thu leh infiamna chu skill chikhat nia a ngaih thu sawiin, sports leh skill insuihfin dan kawng hrang hranga sawrkar laipui chu a dawr tawh dan leh a taka hlawhtlin a beisei thu a sawi bawk.
North East RCM hi Young Indians Chapter chair – Mizoram Robert Rohmingliana’n kaihruaiin, Young Indians Regional chair – Northeast Christine L Sailo leh National vice chairman Young Indians Arun Rathod pawhin thu an sawi a. Thupui 14-a regional mentors presentation ngaihthlak a ni. Guwahati, Nagaland leh Mizoram Chapter atangin hmalakna tha a neih, ‘best practices’ sawiho a ni.
Young Indians hi India rama industry lama hmalatu pawl lian ber zinga ngaih, CII hmalakna niin, thalaite, a bikin an thlur a. India state hrang hrangah Young Indians hian Chapter 70 chuang an nei a, member mi 7000 chuang an awm a ni.