US-in Taliban hotu lawkte luman a hnuk kir

US-in Taliban hotu lawkte luman a hnuk kir
US chuan Taliban hruaitu lawk tak takte luman a chhiar chu a paih a, heng zingah hian Afghanistan-a Haqqani hel pawla an hruaitu ber, Sirajuddin Haqqani pawh telin ani hi Taliban sorkara interior minister ni lai a ni.
US kaihhruaia Afghanistan-a indona a awm lai khan Haqqani network hi beihna lian tak tak thlentua puh kha an ni thin a. An chetna zingah American leh Indian embassy beihna leh NATO sipaite beihna pawh a tel.
President Donald Trump-a sorkar hmasak lai, kum 2021-a US leh Taliban ten inremna an siam anga ram dang sipaiten Afghanistan an chhuahsan hnuah Taliban sorkar ding zuiin hetah hian Haqqani network pawh an tel.
President Trump-a hun hnihna a intan atanga rei lo teah luman an chhiarte a hlihsak a. Hlihsak an nih hma lawk hian US thuneituten Kabul-ah Taliban sorkar hi kawmin kum 2022-a American khualzin an man pawh an chhuah.
US state department thupuangtu chuan Haqqani, a unaupa Abdul Aziz Haqqani leh an makpa (an farnu pasal) Yahya Haqqani te chu ‘luman nei tawh lo’ an nih thu a sawi a. Hetih rual hian ‘Specially Designated Global Terrorists’-ah chuan la tel zelin Haqqani Network pawh Foreign Terrorist Organization an la ni reng tih a sawi.
FBI webpage-ah pawh Thawhtanni kha chuan Haqqani-a luman $ maktaduai 10 tih tar lan tel thin chu lak thlak a ni tawh.
Taliban interior ministry thupuangtu, Abdul Mateen Qani chuan luman hlihsak hi an sorkarin ‘palai tira an inbiakna rah’ a nih thu a sawi a. “Rahbi pawimawh tak a ni a, hei hian ram dang, a bikin United States nena kan inbiak thatna a lantir a. US aiawhte pawh hian kan inkarah a thaa inbiak leh inrintawnna neih zel an duh a ni,” a ti.
Inrinni khan US aiawh, hostage envoy Adam Boehler leh Afghanistan-a an palai thin, Zalmay Khalilzad te chuan Taliban sorkara Foreign Minister Amir Khan Muttaqi leh Taliban hotu dangte chu Kabul-ah an hmu a. Hemi hnuah hian US mi, December, 2022-a Afghanistan a tlawh laia man, George Glezmann-a chu Taliban sorkar hian a chhuah zui.
An hruaitu lawkte luman hlihsak hi an inbiaknaah hian an sawi tel em tih erawh hriat a ni lo.
Haqqani-a pa, Jalaluddin Haqqani-a’n kum 1980 chho vela a din, Haqqani network hi a tirah chuan CIA-in a puiha Afghanistan leh Pakistan-a Soviet chetna dotu an ni a. An kal zel hnuah khawthlang ram dotu pawl chak ber pawl an ni zui ta a ni.
Kum 1996-a Taliban-in Afghanistan an thunun lai khan an thawhpui nghal a. A dintu, Jalaluddin Haqqani-a hi kum 2018 khan a thi.
Tunah hian Haqqani-a hi Afghanistan-a Taliban sorkara thiltithei ber zinga mi niin Taliban supreme leader Mullah Hibatullah Akhundzada nena an inkar pawh a tha vak lo.
Taliban sorkarin hmeichhiate zirna a kalpui dan chu an inmil lohna lian ber pakhat a nih thu a sawi a. Haqqanis hian pangngai taka thil kalpui an duh laiin supreme leader hian hmeichhiate khuahkhirh an duh niin an sawi.
Tuna US-in a luman a hlihsak pawh hian pawn lamah pawh a lian telh telh tih a tilang a, Taliban-in ram dang pawmna an neih theih nan pawh a thawh hlawk zel a ni.