Mizo mipui buaina chin fel sak thintu chu BJP sawrkar – Vanlalhmuaka

Mizo mipui buaina chin fel
sak thintu chu BJP sawrkar
– Vanlalhmuaka
Mizoram sawrkar leh Mizo mipui buaina min chinfel sak thintu chu Modi kaihhruai BJP sawrkar a ni tih Mizoram BJP hruaitu Vanlalhmuaka chuan a sawi.
March 28-a an party office-a inkhawmah BJP State president Vanlalhmuaka hian, Mizo mipuiin harsatna kan tawh hrang hrang heng – Tripura Bru repatriation chungchanga kum 23 deuhthaw kan lo buaina, eng sawrkar mahin an chinfel theih loh chu Union Home minister Amit Shah chuan kum 2019 khan min chinfel sak a. Kum 1987 atanga Aizawl khawpui atanga Zokhawsanga Assam Rifles sawn chhuak tura Mizo mipuiin kan lo beisei tawh chu Union Home minister vek hian 2023 April 1-ah Zokhawsang AR headquarters rawn hawngin, 2025 March 15 khan Assam Rifles-in an luah ram chu Mizoram sawrkar kuta hlan a ni a, Pu Amit Shah chuan min chinfel sak leh ta a. Airforce hnena Lengpui Airport hlan tura hmalakna awm nia hriat avanga mipui buaina pawh Union Home minister hian chief minister Pu Lalduhoma thurawn pe in, Lengpui Airport chu civil airport-a buatsaih tur leh Airport Authority of India kuta hlan atan buatsaih turin thurawn a lo pe leh ta tih a sawi.
“Pu Amit Shah khan Aizawl khawpui atanga Assam Rifles sawn chhuah an nih chhan chu, Aizawl khawpui tawt lutuk, hmasawnna kawnga hmalak ngaihna awm tawh lo tih ziaawmna atan leh AR ram chhuahsan hmangin Aizawl khawpui chu India khawpui mawi berah chei theih a nih dawn avangin Pu Modi sawrkar chuan hetiang hian hma a la ta a ni, tiin a rawn sawi a. Hei vang hian kan state sawrkar leh Zoram mipui pawhin AR ram chhuahsan hi Aizawl khawpui hmasawnna atan leh khawpui mawi tak a lo nih theihna atana buatsaih turin BJP Mizoram chuan kan beisei a ni,” a ti.