Ram dangin lirnghing tuarte pui nasa
Ram dangin lirnghing tuarte pui nasa
Magnitude 7.7-a nain tual chhung indona awm mek, Myanmar leh Thailand a sawia thi chu mi 1,600 chuang an tling tawh a, thil chhia a tam hle bawk a. Ram hrang hrangin chhawmdawlna an pe mek zel.
China chuan Inrinni khan chhanchhuah hna thawktu tur mi 82 a thawn lut tih Beijing-a emergency management ministry chuan a sawi a. Inrinni vek khan Yunnan province atangin rescue team dangin Myanmar-a sumdawnna khawpui, Yangon an thleng bawk tih CCTV chuan a tar lang.
Chinese sorkar hian yan maktaduai 100 ($ maktaduai 13.8) a pe dawn bawk a, ram dang tanpuina buaipuitu pawl chuan sum hi Thawhtanniah an pe dawn tih a puang.
Hong Kong pawhin Myanmar-ah hian chhanchhuah hna thawktu tur mi 51 leh mi zawng thiam ui pahnih a tir a. Bungraw pawimawh tonne kua zeta rit an keng bawk.
India chuan Inrinni khan thlawhnain puihna phur a thawn lut a. Foreign Minister Subrahmanyam Jaishankar chuan C-130 military transport plane hian damdawi atana hman chu hmanrua, puan lum, ei tur leh ni tin mamawh a phur tih a sawi.
“Search & rescue team leh medical team pawh thlawhnaah hian an chuang,” a ti.
India sorkar thuneitute chuan thlawhna dang paliin mihring leh hmanrua an phur lut leh dawn a. Hengah hian field hospital pawh a tel dawn a, navy lawng pahnih pawh an tir dawn tih an sawi.
World Health Organization (WHO) chuan Dubai khawpuiah mamawh phurh chhuah tur ngaihtuahin an inchah khawm mek a, rikruma chet chhuah ngai tih a puang tawh.
Khawvel puma hriselna buaipuitu pawl hian an hmunpui, Geneva atangin lirnghing hi an ngaihven hle a tih a sawi a, ‘nunna leh hriselna atana hlauhawm tak dinhmunah an ding’ tiin thupuangtu, Margaret Harris chuan thuthar lakhawmtute hnenah a sawi.
UN humanitarian agency OCHA chuan Inrinni khan an thawhpui pawlte nen chet lak dan tur an dap a. “Damdawi mamawh – trauma kit, thisen ip, kahhikna, mi zawnna, ni tin mamawh leh puan in an indaih lo hle,” tiin thuchhuah an siam.
United States President Donald Trump-a chuan Zirtawpni khan Washington-in Myanmar a puih dawn thu leh lirnghing chu ‘rapthlak’ a tih thu a sawi.
“Kan pui dawn a, an ram nen pawh kan inbe tawh,” tiin Trump-a hian Oval Office-a thuthar lakhawmtute hnenah a sawi.
European Union chuan mamawh zualpui phuhruk nan Euro maktaduai 2.5 ($ maktaduai 2.7) a pe tawh a, hei bak pawh pek zel tumin tangrual ram hi an insangmar mek.
Ireland chuan euro maktaduai ruk an pek tur thu leh a zahve chu Red Cross-ah pein a dang chu UN agency-ah an pe dawn tih a sawi.
Malaysia-a foreign ministry chuan Myanmar-ah team an tir dawn tih a puang a. Commander pakhat leh a ho tur mi 49 chu an tir dawn tih a sawi.
Foreign Minister Mohamad Hasan-a chuan ASEAN-a an member-pui, Myanmar leh Thailand pui tur hian an inring reng tih a sawi.
Philippines chuan Inrinni khan mi 114 awmna team tirh an tum thu an puang a, hetah hian damdawi thiam, kang thelhtu leh sipaite an tel a. Thawhlehniah an thleng ang.
South Korean foreign ministry chuan $ maktaduai hnih an thawn dawn tih a sawi a. “Korean sorkar chuan he sum hian nunna chhanin hrehawma awmte a hnem ngei a beisei,” tiin thu an chhuah.
New Zealand chuan puih nan NZ $ maktaduai 2 ($ maktaduai 1.1)-a tanpuiin International Red Cross-ah an pe dawn a. “A tuartute kan tawrhpui tak zet a ni,” tiin Foreign Minister Winston Peters-a chuan a sawi.
Zirtawpni chhuna lirnghingin a sawiah hian Myanmar chuan an tuar na hle a. Sipai sorkar hnuaia awm an nih avangin chet lar a harsa a, inbiakpawhna leh inkalpawhna a chhe nasa hle bawk.