Manipur buainaa a pa hming ri Sangma-a’n sawi fiah

On Apr 3, 2025 13 0

Meghalaya Chief Minister Conrad K Sangma chuan Thawhlehni khan Manipur chief minister hlui, N Biren Singh-a’n an state politics buainaah a pa, P A Sangma hming a lam ri ve chu ‘vanduaithlak’ a tih thu a sawi a. Khatih hun lai kha chuan tute pawhin Manipur-a remna leh muanna a awm theih kha an duh vek a, ‘politics-a hamthatna lak’ tumna a ni lo tih a sawi.
Singh-a’n Thawhtannia X-a a thu tar lan chu Sangma chuan chhangin, “Pu N. Biren Singh-a’n Pu P. A. Sangmaji (L) hming a lam hi a vanduaithlak a. Pu Sangma kha hmarchhak mipuite tana bei ngar ngartu a ni a. Thil hrang hrangah hmarchhak mite dikna atana beia au chhuak thin a ni a. A hun lai pawh khan Manipur-a remna leh muanna awm theihna turin mi tinin an bei a, politics-a thiltihna a awm lo,” a ti.
Inpumkhatna a pawimawh thu pawh tar langin, “Kan thawkho vek a. Manipur mipuite dinhmun that zawk nen bei zel ang u, chu chu Pu P.A. Sangma duh dan pawh a ni,” a ti.
Singh-a hian tun hnai khan P A Sangma khan ‘ngaihdan hlauhawm tak’ neiin hmarchhak chu chibil mil zela state tereuh tetea then a duh tih a tar lang a, hetiang rilru hi tuna Manipur-a buaina irh chhuah chhan bul ang hi a ni tih a sawi.
Singh-a hian Manipur buaina mek chu pawn lama fuihtu awm vang niin a sawi bawk.
Manipur chuan a ramri himna turin ke a pen mek a, heng zingah hian Inner Line Permit (ILP) leh Free Movement Regime (FMR) khauh zawka kenkawh pawh a tel a. “Kum tam tak chhung ram leilung fate himna kan ngaihtuah hnuah a tak takin kan kalpui tan a, heng zingah hian ILP hman pawh a tel,” a ti.
State pahniha hotu liante an inhnial mek lai hian Sangma kaihhruai National People’s Party (NPP) leh Singh-a telna, BJP chu Manipur-ah an inmil lo mek bawk.
November 17, 2024 khan NPP hian BJP kaihhruai Manipur sorkar an thlawpna an hnukdawk a, Singh-a sorkar kha an state-a chi leh chi intihbuaina hmet mit thei lovah an puh a. An inhnuhdawh hian BJP sorkar erawh a tinghing lo va, Naga People’s Front (NPF) leh independent MLA pathum thlawpna nen thlawptu 37 an nei tho a ni.
Tar lan tawh thin angin Manipur hi thla 23 zet chi leh chi inkara buaina a awm hnuah February 9 khan Singh-a hi chief minister atangin a bâng a, February 13-ah President’s Rule-a dah zui a ni.