A puhtuin a hming a puanzar duh loh avangin judge-in Sean ‘Diddy’ Combs lawsuit titawp

A puhtuin a hming a puanzar duh loh avangin judge-in Sean ‘Diddy’ Combs lawsuit titawp
Nikum October thlaa rapper leh sumdawng hausa tawntaw Sean ‘Diddy’ Combs laka case an ziah luh chu a puhtu, Jane Doe inti chuan ama hming tak a puanzar duh loh avangin court-in he case hi a titawp.
Nikum October khan hmeichhe pakhatin a hming lema Jane Doe tih hmangin he rapper lakah hian zahmawh rawngkaia innawr luih thubuai a theh lut a, mahse, U.S. District Judge Lewis J. Liman chuan Jane Doe hian a hming takin March ni 20 thleng khan thubuai a siam nawn loh avangin case a tih tawp thu March ni 31 khan a puang ta a ni.
March ni 6 khan Jane Doe hian Sean ‘Diddy’ Combs laka a thubuai theh luhah hian a hming tak hmang lo a kaltlangpui zel a dilna chu court-in a lo hnawl tawh a, March ni 20 ral hmaa a hming dik taka thubuai theh lut turin a lo ti tawh a, Judge Liman chuan March ni 31 thlenga a hming dik tak hmanga complaint a theh luh loh avang leh, chutiang tihna tur hun a dil belh bawk loh avangin thubuai a tih tawp thu a puang ta a ni.
Jane Doe thubuai a tawp takah chuan Combs-a ukil-te chuan lawmawm an tih thu sawiin, attorney Tony Buzbee-a’n Combs laka thubuai a theh luh dang pawh tihtawp thuai a nih an beisei thu an sawi bawk. Tony Buzbee hian nikum October khan mi 120 chuangin Combs an puhna a dawng tih sawiin, thubuai eng emaw zat a theh lut ve bawk a ni.
Combs an puhna case pahnih chu tihtawp a ni ta a, mahse, tunah hian sex trafficking chungchanga Combs puhna dang thahnem tham tak a la awm a, hei vang hian Combs pawh Metropolitan Detention Center, New York-ah kawl mek a ni a, a chungthu hi thla tharah ngaihtuah tan a ni tawh dawn a, an puhna hrang hrangah Combs hian thiam lohna a nei lo niin tan a khawh ve thung a ni.