Ramsa tawlhruk tum man

Ramsa tawlhruk tum man
March 2 chawhma dar 10.30 vel khan Champhai Forest Division leh Assam Rifles tangdun chuan Zokhawtharah exotic ramsa chi hrang hrang tawlhruk an man.
Ramsa tawlh an man hi – Albino Burmese Python 1 , African spurred tortoise 27 leh Patagonian mara 3 an ni a. Indo- Myanmar international border kaltlanga tawlhruka inhnamhnawih nia hriat mi 6 chu man nghal an ni.
Dan khauh tak – ‘The Wildlife (Protection) Act 1972’ kalha heng ramsa tawlhruknaa inhnamhnawih nia sawi mi 6 – Jessie Lalnunmawia, Biakzapianga, Lalzuitluangi, Denga, Lalhmangaihthanga, an vaiin Zokhawthar Champhai district vek leh Thawnsuangmuang Khawmawi Myanmar chu Champhai Judicial District judicial magistrate thupek angin Champhai District Jail-a dah an ni.
An thil tawlhruk hi international market-ah chuan cheng nuai 130 hu vel nia chhut a ni.
March 26 khan Khawzawl Wildlife Division staff-te chuan Wildlife Protection Act 1972 kalha Khawzawl rama sakhi (barking deer) leh Varung (Rufous throated partridge) kaptu Biakchungnunga, Khawzawl Lungvar Veng chu a sa kahhlumte nen an man a. Champhai District Court thupek angin Champhai District Jail-ah dah a ni bawk.