Leiverh chima chhanchhuah hna ni 15-ah zo tawh dawn

Leiverh chima chhanchhuah hna ni 15-ah zo tawh dawn
Telangana Revenue Minister P Srinivas Reddy chuan mi paruk an la hmuh lohna, SLBC leiverh chima chhanchhuah hna chu ni 15 lo awm leh tur chhunga an thawh zawh hman tur thu Nilaini khan a sawi.
February 22-a chim, Srisailam Left Bank Canal leiverh hna thawh mekah hian engineer leh inhlawh mi pariat chim hnanin an tang a, ruang pahnih hmuh tawh a ni a. State, sorkar laipui leh mi mal agency hrang hrangten a zawn hna an la thawk reng.
Chhiatna a thlenna hmuna thuthar lakhawmtute a kawmnaah Reddy-a chuan mi thiam rual 700-800 chuangin thuneitute enpuina hnuaiah ni 40 chhung chhun zan zawmin hna an thawk tawh tih a sawi a, mi 550-560 velin an la zawn chhunzawm bawk tih a sawi.
“SLBC leiverha mi zawn hna hi ni 15 chhunga zawh fel a ni tawh dawn a. Metre 105 atanga 110 inkar vel hai leh chuan a tawp kan thleng ang a, tihtawp a ni tawh ang,” a ti.
Lei verhna khawl liantakah thir leh thil dang tam tak a tang a, chirh chhah tak a awm bawk avangin hna a sawt lo va, a hlauhawm em em bawk tih Reddy-a chuan a sawi a. Heti chung hian state sorkar chuan chhanchhuah hna thawktuten harsatna an tawh lohna turin ruahmanna a siam tih a sawi.
Minister chuan leiverh hainaah hian nunna chân an awm lohna turin tul zawng zawng pawh ngaihtuah a nih thu a sawi.
District thuneitute chuan leiverh chhunga lei tangte chu army leh Hyderabad Disaster Response & Asset Monitoring & Protection Agency-in a paih hna an thawk tih an sawi.
South Central Railway-in loco train hmangin steel rod an tan bun leh thil dangte an phur chhuak reng bawk a. Kerala atanga ui fing chah luhin mi tangte hnu a chhui zel bawk.