Congress sawrkar laia zu zawrh aiin zalen zawk ang – Zoramthanga

Congress sawrkar laia zu zawrh aiin zalen zawk ang
– Zoramthanga
ZPM sawrkarin zu zawrh a tumna chu Congress sawrkar laia zu zawrh aiin a zalen zawk dawn niin MNF hruaitu Zoramthanga chuan a sawi.
Zirtawpnia Vanapa Hall-a Aizawl district MNF village council /local council thlan thar leh VC/LC term 7 tling tawhte an chawimawinaah MNF president Zoramthanga chuan, Pathian duh loh leh Bible kalh a nih avangin zu leh zu zawrh chu an do zel dawn tih sawiin, “Zu zawrh tumnaah hian alcohol content bithliah a ni si loa, khuahkhirh a nih dan leh phalrai a nih dan turah a huamzau dawn hle. Congress sawrkar laia zu zawrh aiin a zalen zawk dawn. Zu leh zu zawrh sawimawitu party chuan tunah hian MLA pakhat a nei ve tawk,” a ti.
MNF chu Pathianin a changin a ti tling a, a changin a titla nia sawiin, roreltu ni reng se, an kal thiam lo anga, an laktlak loh viau tawh ang tih a sawi. Insiamthat leh insiamremna hun a siamsak thin niin a sawi.
VC leh LC thlan tharte a lawmpui tih MNF hruaitu hian a sawi a. Mipui leh party unit nen tha taka thawkho turin a chah. MNF chuan thuthlung a vawn tlatna chu Pathianin an felnaah a ruat a, party tamtak an thamral hnuah party ruhrel lian ber an la ni ta reng tih a sawi bawk.