Congress-in a intiamna tihlawhtling thin – Dr A Chellakumar
Congress-in a intiamna tihlawhtling thin
– Dr A Chellakumar
All India Congress Committee-a Mizoram in-charge Dr A Chellakumar chuan MNF leh ZPM party-in an sawrkar hmaa an intiamna an tihlawhtling lo ve ve a, Congress chuan a intiamna a tihlawhtling thin tih a sawi.
Mizorama tlawha lo kal AICC in-charge Mizoram hian Zirtawpni khan Congress Bhavan-ah hun a hmang a. Congress chuan ram mipui rawngbawl hi an mawhphurhnaah an ngai, tiin, Congress a sawrkar loh chuan India ram leh mipuiin kan tuar thin a, ram leh mipui chhanchhuak turin Congress a sawrkar leh a ngai tih a sawi.
Congress party chu Mizorama remna leh muanna thlentu, UT leh state dinhmuna hlangkaitu a nih bakah vawiina ralmuang taka kan awm theih chhan hi Congress party vang a ni tih MP hlui Dr A Chellakumar hian a sawi. Congress sawrkar laiin Mizorama hmasawnna atana pawimawh airport, college, school, hydel project bakah hmasawnna ruhrel zawng zawng deuhthaw din a ni tih a sawi bawk.
“Thangtharten an hre phak loa, Mizorama in tam tak di in a nih lai khan Congress sawrkar chuan rangva chhungkaw sing tel a pe a a; NLUP pawh chhungkaw 140000 chuangin an dawng,” a ti.
Congress chuan an intiamna an tihlawhtling thin a. Tunhnaia an chakna Karnataka leh Telangana-ah pawh an intiamna an tihlawhtling mek tih AICC hotu hian a sawi.
“Mizoramah pawh NLUP kan sem ang kan ti a, kan sem mai a ni. MNF khan an sawrkar hma khan chhungkaw tin hnenah cheng nuai thum sem an intiam a, an sem ta em? ZPM-in sawhthing Rs. 50-a lei an intiam a, minimum support price pek an intiam a, an lei ta em? ZPM-in MSP pek an tum an pek theih loh hi Congress party chuan central-a kan sawrkar chuan pek kan tiam a ni,” a ti. Tunah hian ZPM-in an intiam anga hma an lak loh avangin loneitute an beidawng em em niin a sawi bawk.
India ramah minority an tam a, Mizoram pawh ram pum ngaihtuahin minority a ni tih a sawi. “India chhim tawp Kanyakumari chhuak ka ni a, ka awmna district-ah chuan Kristian, Hindu leh Muslim kan inneih pawlh a, kan inenhrang lem lo. Mahse BJP a rawn sawrkar a, ram pumah inthenhranna politic an rawn kalpui ta a, a pawi hle. Heng inthenhranna titawp tur hian Congress a sawrkar leh a ngai,” a ti.