Mizoram huamchhunga Tripura sawrkar chetna minister-in endik

Mizoram huamchhunga Tripura
sawrkar chetna minister-in endik
Forest minister Lalthansanga chuan Mizoram chhunga Tripura sawrkarin kut a thlakna, Phuldungsei Jampui Hills-a Thaidawr tlang a tlawh a. Jampui Mizo Convention leh Phuldungsei khawtlang hruaituten an lo dawngsawng.
Thaidawr tlangah hian Tripura sawrkarin hma an lo la a ni tih an hriatin a hmuna enfiah tul an ti tih Forest minister hian sawiin, “Helai hmun hi tuan leh mang ata Mizo lalte luah ram leh thuthmun a ni a, chutih rualin enkawl leh tuaihnum kawngah kan lo muthlu rei hle tih Mizo Convention nen kan inkawmna atangin a lang a, a pawi takzet,” a ti.
Kalphung thar mipui sawrkarah helai hmun hi ngaihsak zel an tum anga, kum 40 zet he ram tana lo bei tawhtu chief minister Pu Lalduhoma’n Mizoram ramri a vei a, Boundary Commission tha tak din niin Assam nena kan ramri buaina pawh he Boundary Commission hian a bawhzui a, hetianga Tripura sawrkarin kan ram chhunga kut a rawn thlak hi a ngaihthah mai a rinawm loh tih a sawi bawk.
“Helai chhehvela cheng mipui pawhin lungrual taka sawrkar hmalakna thlawpa in thawhpui zel ka beisei a, politics inchirthehnan leh inlungrualna tichhetu atan hmang lo turin ka chah che u a ni,” Lalthansanga hian a ti.