Psychiatry ward khat deuh reng

Psychiatry ward khat deuh reng
Mizorama Psychiatry ward nei awmchhun Kulikawn Hospital-a Psychiatry khum 24 chu a khat deuh reng tih thawktute chuan an sawi.
Khum 50 awmna Kulikawn Hospital hi Nilaini khan Health minister Lalrinpuii’n a tlawh a. Hospital building thar sak tumin ruahmanna a awm mek chungin, mipui tan tuna a nihna ang ang hian tangkai zawka service an pek theih dan a hmunah a enpui.
Health minister hi medical superintendent Dr James RE Mawia leh a hoten an lo dawngsawng a. Tunah chuan Mizoram Universal Health Care Scheme beneficiary 30 an enkawl tawh. Khum luah dan (damlo neih dan) hi a tlangpuiin zaa 52 vel a nih bakah Mizorama Psychiatry ward nei awmchhun a nih avangin Psychiatry khum 24 chu a khat deuh reng tih an sawi.
Pathian puihna azarah mipui harsatna chhawk zangkhai turin sawrkar scheme thar – Mipui Healthcare a hlawhtling chho zel tih Health minister hian sawiin, PHC/CHC, District Hospital leh ZMC&H thawktuten mipui tan theihtawp an chhuah zel tih a sawi a. Kulikawn Hospital thawktute pawh tan la lehzual turin a fuih a, a bikin nurse-te chu damlo tawngtai sak bakah tawngtaipui tam turin a chah.
Kulikawn Hospital-ah hian naupang lam doctor tha tak a awm a, medicine doctor tha tak, hmeichhe lam doctor tha tak bakah dental doctor 4 an awm tih minister hian sawiin, heng an doctor thiamte hi mipuiin tun aia nasa zawkin pan se a duh tih a sawi a ni.