Vbch. 13 chuang sengin Central Jail sa tha dawn

On Apr 23, 2025 68 0

Vbch. 13 chuang sengin Central Jail sa tha dawn
Sawrkar chuan cheng vaibelchhe 13.925 sengin Central Jail a thawmtha dawn a, cheng nuai 90.23 sengin mi 70 vel len theihna ward thar sak a ni bawk.
Thawhlehni khan Home minister K Sapdanga chuan Central Jail hi a tlawh a. IG Prison R Vanlalsawta leh thawktu dangten an lo dawngsawng. Ward hrang hrang bakah workshop, ICTC, library, hall an fang a. Central Jail-a cheng nuai 90.23 senga ward sak thar (C Ward), tang (prisoner) 70 vel awm theihna a hawng nghal bawk.
Central Jail a tlawh zawh hian a bul ami, hmeichhe jail (Central Women’s Jail) tlawhin, ward hrang hrang a fang leh a ni.
Central Jail hi 1986 September 15-a commission (luah) tawh a ni a. A building a hluiin, a chhe tawh a. SASCI Part I atangin cheng vbch. 13.925 senga sakthat tum a ni. Home minister leh a kaihhnawih department hotuten jail thiah huna tangte awm lailawkna ruahman dan tur an thlir ho nghal.
Tunah Central Jail-ah tang 854 an awm a. Damchhunga tang tur (lifer) 56, an thubuai ngaihtuah mek (UTP) 457, an chungthu court-in a relfel tawh hrehawm taka tang tura tih (RI convict) 263 leh hahdam deuh zawka tang tura an chungthu rel (SI convict) 78 an ni
Central Women’s Jail-ah hian tang 132 an awm thung a. Lifer an awm loa, UTP 96, RI convict 23, SI convict 6 leh an nuten an luhpui naupang 7 an awm a ni.