Brahmaputra Board hotulu in CM leh I&WR minister kawm

Brahmaputra Board hotulu in CM leh I&WR minister kawm
Sawrkar laipui Ministry of Jal Shakti hnuaia awm Brahmaputra Board chairman Ranbir Singh, IAS (Retd) chu Mizoramah a lokal a. Thawhlehni khan Irrigation & Water Resources minister PC Vanlalruata leh Nilaini khan chief minister Lalduhoma a kawm.
Chief minister hian Brahmaputra Board-in mamawh an sawi chu a theih anga a lo ngaihven sak tur thu a hrilh a. Sawrkar laipui Flood Bank Management fund an hmuh ve theihnan a tul angin dan siam an tum dawn tih sawiin, lui leh tuihna venhimna lam hna, leilung luangral zel tur venna lama hmalaknaah thawhpui an inpeih reng tih a hrilh.
I&WR minister pawhin Mizoram lui hrang hranga tui chhekkhawlna dam te chi siam a rawt chu Ranbir Singh hian tha tiin hei hi an lo zirchian tur thu minister hi a hrilh.
Mizorama hman atan Flood Zoning Act siam leh tui hna humhalhnan springshed management policy duan a pawimawh a tih thu Brahmaputra Board chairman hian sawiin, Kaladan leh Khawthlang Tuipui tana master plan chu Board-in a buaipui mek a, hemi puitlinna atan Mizoram Sawrkar thawhpuia an mamawh tih a sawi a ni.
Brahmaputra Board hi kum 1982-a sawrkar laipuiin a din a ni a. India hmarchhaka luite venhim hna, leilung luangral ven hna, tuihna leh lui kaihhnawih thil tul zirchianga hma la tura din a ni. Mizoramah Zemabawkah regional office atan mimal in an luah a ni.
Brahmaputra Board hotute hi Barak Basin Management Plan-a inrawnkhawmna tela Aizawl lokal an ni.