India-Pakistan inkar khi karah an sipaiten khaikhin an hlawh

India-Pakistan inkar khi karah an sipaiten khaikhin an hlawh
Kar kal ta Thawhlehnia Pahalgam-a mi firfiakte chetna avangin India leh Pakistan inkar a chhe chhunzawm zel a. Pakistan chuan India-in sipai chakna hmanga a beih mai theih thu an sawi a, ram pahnihte hi sipai chaknaah khaikhin pawh a hlawh mek.
Nuclear ralthuam nei ram inthenawm hi kum 77 chhung an ram a din hnuah an indo fo tawh a. Tun hnaia India-a beihna lian ber tling, Pahalgam, Jammu & Kashmir-a khualzin 26 thihna chuan indona dang a hrin mai rinna a lian hle.
Prime Minister Narendra Modi-a chuan a sipaite chu zalenna pein a hun, an bitum tur leh chet dan tur chu an kutah a dah nia sawi hial tawh a ni.
Pakistan chuan beihna thlengah khan inrawlhna a nei lo tih sawi mah se Indian sipaiten an beih mai rinna an nei a, an minister tam takin hei hi intelligent-te report atangin a thlen an ring.
India hian sipai 14,75,000 a nei a, Pakistan let hnih aia tam a nei niin International Institute for Strategic Studies chuan a sawi a. Sipai tana sum a dah pawh a henawm ram sum dah let riat chuang niin nikum pawh khan $ tluklehdingawn 86 a tling a, khawvela sipaia inseng tam ram panga zingah a tel.
Sipai zat piah lamah hian New Delhi hian Kashmir ram leilung a hre chiang zawk a, a chhengchhiat dan a bel zawka ngaih a ni.
Hetih lai hian indona chhuak ta se India tana buaithlak thei chu ramri-ah sipai an inrintir a intam hleih a. India hian China nena an inrinaah sipai tam tak a chhawp sa reng a, Pakistan erawh chuan Afghanistan nena an inrinaah hel an tam avangin a dah tam zawk.
Observer Research Foundation (ORF) Vice President Harish Pant-a chuan India-in China leh Pakistan hnaiha sipai dah ve ve a ngai chu a chet that lohna a ni thei tih a sawi.
“India hian sipai ngah zawk mah se ramri pahnih ven a ngai hi a buaithlak thei,” tiin a sawi tih Bloomberg chuan a tar lang.
India leh Pakistan hian nuclear ralthuam 170 ve ve an nei niin Arms Control Association chuan a sawi a. A kah chhuahna tur hmanrua, missile ang chi-ah pawh an inel nasa bawk.
India hian ‘hmang hmasatu nih loh’ tih thupuiah a nei a. Pakistan thung hian nuclear ralthuam, Nasr (Hatf-9) ballistic missile siamin km 70 chuang a kap thei a. Islamabad hi chuan hmang hmasatu nih loh tih lam thupui a nei ve lo.
Kah thui theih lamah erawh India a chungnung a. Khawmual atanga kah theih Agni-V missile chuan km 5,000 atanga 8,000-a hla a kap thei a. Pakistan-in Shaheen 3 missile a neih, a tihchangtlun mek chuan km 2,750 chuang a kap thei thung a. A kah chhuahna hmun azirin India pawi nasa tak khawih theih a ni.
Ram pahnihte hi ram dang atanga ralthuam lei nasa ve ve niin Russia leh China an dawr tam hle.
Tun hnaiah India hian US, France leh ram dang a hawi ta hret niin Stockholm International Peace Research Institute chuan a tar lang a. Russia-a a innghah thinna chu kum 2009-2013 inkara 76% a nih laiin 2019-2023 inkarah chuan 36%-ah a tla.
New Delhi hian a ralthuamte chu US leh Europe-a ralthuam siamtu liante nen tihchangtlun kawngah an thawkho nasa bawk.
Pakistan hian China atangin ralthuam a chaw lut nasa em em thung a. China atanga a lak luh hi 2019-2023 inkarah 82% niin 2009-2012 kha chuan 51% chauh a la ni niin SIPRI chuan a tar lang.