US khumin India nena insumdawn tawn tam berah China kai

China hian US khumin India-in kum 2025-26 chhunga sumdawnnaa thawhpui lian ber a ni thar a, ram pahnihte insumdawn tawnna chu USD tluklehdingawn 151.1 a tling a niin sorkarin a chhinchhiahnaah a tar lang.
US hi kum 2024-25 thleng khan kum li chhung zet a zawnin India-in a sumdawnpui lian ber a ni.
Tangka kum kalta chhung khan India-in China-a a thil thawn chhuah chu 36.66%-in a pung a, USD tluklehdingawn 19.47 man a ni a, a lakluh pawh 16%-in a pung a, USD tluklehdingawn 131.63 man a ni bawk a. A thawn chhuah aia a lak luh tamna kum 2025-26 khan USD tluklehdingawn 112.6 a ni a, kum 2024-25 khan USD tluklehdingawn 99.2 a ni.
US-a a thawn chhuah chu tangka kum kalta chhung khan 0.92%-in a pung a, USD tluklehdingawn 87.3 man a ni a, a lakluh pawh 15.95%-a pungin USD tluklehdingawn 52.9 man a ni thung a. A lak luh aia a thawn chhuah tamna hi kum 2024-25 chhungin USD tluklehdingawn 40.89 a ni a, kum 2025-26 erawh kha chuan USD tluklehdingawn 34.4 chauh a ni thung.
Commerce ministry-in an chhinchhuah dan chuan kum 2013-14 atanga 2017-18 thleng khan China hi India sumdawnna lama thawhpui ber a ni a, kum 2020-21 pawh khan a ni a. China hma khan UAE chu India-in a sumdawnpui lian ber a ni a. US hi kum 2021-22 hnua a thawhpui lian ber a ni thung.
Kum 2025-26 chhunga India-in a sumdawnpui rama thil a thawn chhuah a tlakhniamna chu Netherlands, UK, Singapore, Bangladesh, Saudi Arabia, Australia, France, South Africa leh Malaysia te an ni.
Tangka kum liam ta khan UAE, Germany, Hong Kong, Italy, Nepal, Brazil, Spain, Belgium, leh Vietnam-ah a thawn chhuah chu a hma kum aiin a tam zawk ve thung.
Kum 2025-26 chhunga India-in bungrua a leisak a tlakhniamna chu Russia, Iraq, Indonesia, Australia, Qatar, leh Taiwan te an ni a. Hetih chhung vek hian UAE, Saudi Arabia, Hong Kong, Switzerland, Singapore, Japan, Korea, Germany, Thailand leh Malaysia atanga thil lakluh chu pung ve thung.