India-in a beihnaah JeM chief Azahar-a chhungte 10 thi

India-in a beihnaah JeM chief Azahar-a chhungte 10 thi
Pakistan-a hel pawl hruaitu chuan India-in missile-a a kahnaah a chhungte 10 an thi tih a sawi.
Jaish-e-Mohammed (JeM) chief Masood Azhar-a hian a u leh a pasal, an fapa leh an mo, an fate naupang panga nen an chhungkuain Bahawalpur, Pakistan-a mosque kahnaah an thi tih a sawi.
India hian Nilaini tuk khan Pakistan leh Pakistan awp Kashmir a kap a, Islamabad chuan he beihna hi ‘rawng taka nawrna’ a nih thu a sawi.
India chuan chawlhkar hnih kal taa an awp chin Kashmir-a helhovin Indian 25 leh Nepali pakhat an thah phuba an lakna niin an sawi a. Pakistan chuan he thilah hian inrawlhna an nei lo tih a sawi thung.
Indian police chuan a beitu zinga pahnih kha Pakistani an nih thu an sawi a, Delhi hian Pakistan-in helho hi a pui niin a puh bawk a, Islamabad chuan a pha thung.
India chuan Nilaini tuka a kahte hi ‘India beitu firfiakte awmna leh ruahmanna an siamna, ral an relna hmun’ niin a sawi.
Pakistan chuan hmun ruk kah a nih thu a sawi a, India chuan heng hmunte hi mi firfiakte hmunhma vek a nih thu a sawi.
India chuan Pakistan nena an inrina atanga km 100 vela hla, Bahawalpur-a JeM hmunpui pawh an kap tel tih a sawi.
Mosque video thehdarhah chuan a chung mum pakhat chu a chim a, a chhung vel pawh a chhe nual a, a chungah kua pahnih awmin a chhuatah pakhat a awm bawk.
Bahawalpur-ah hian Nilaini khan a hma zana beihna an tawha thite sunin mipui an pungkhawm a, vui an ni hlawm.
Tual chhung mite chuan beihna an tawk hi an thinrin a, Pakistan-in a chhan let dan tur an ngaihven reng tih an sawi hlawm.
Azhar-a hian kum 1999-a India lung in atanga a chhuah hlim khan JeM hi a din a. Al-Qaeda leh Taliban nen inzawmna an nei niin UN Security Council chuan a sawi a, UN pawhin kum 2019 khan Azhar-a hi firfiakah a puang.
India chuan kum 2001-a Indian parliament beitute kha JeM niin a puh a, anni chuan an pha a. Hemi hnu lawkah hian Pakistan pawhin an pawl hi awm a khap.
JeM hian bomb hmanga February, 2019-a Indian-awp Kashmir-a paramilitary police 40 thahna erawh an tih niin an sawi.
Pakistani thuneitute chuan Nilaini tuka India-in a kahnaah hian mi 31 an thi niin an sawi a. Indian thuneitute chuan Pakistan-in laipui a kahah civil mi 15 an thi tel niin a sawi.
Khawvel ram hrang hrangte chuan nuclear ralthuam nei inthenawm ram hi inbengdai turin an ngen ve ve.