Sericulture-a hna lak dan chhui tur Committee din

Sericulture-a hna lak dan
chhui tur Committee din
Sericulture department-a thawk tur, sericulture demonstrator pali lak tura exam-naah thil diklo a awm niin Mizo Zirlai Pawl-in an sawi chu a chhuichiang tur Inquiry Committee din a ni.
MZP Gen. Hqrs. thuchhuah danin, sericulture demonstrator post 4 hnawhkhat tura hna lak danah thil diklo awma hria in, 2025 May 21 ral hmaa chhuichiang turin sawrkar an ngen a. MZP ngenna angin Sericulture department chuan Inquiry Committee a din a ni. Inquiry Committee-ah department mi ni lo ruat tura an ngenna pawh department pawn lam mi ruat a ni tih a sawi. Ni 30 chhungin report peih hman tura beisei an ni tih a sawi bawk.
‘Sawrkar-in he hna lak dan dik tawk lo chhuichiang tura Inquiry Committee a din nghal hi lawmawm kan ti a. Committee thil chhui leh thil hmuhchhuah hi kan thlir zui reng dawn a ni,’ a ti.
MZP sawi danin, sericulture demonstrator post 4 lak turah Exam Hall-ah mobile phone ken luh niin, exam ve thenkhatin complaint mah se, kaltlangpui nia hriat a ni. Hei hian The Mizoram Direct Recruitment (Conduct of Examination) Guidelines 2018 sl. no.24 – Instruction to Candidate; sl. no.27- Duties of Invigilator a kalhin an hria a ni.
He hna lak turah hian kumin February 17 khan advertisement tihchhuah a ni a, mi 41 dilna pawm niin, mi 14 hnawl an ni. Mi 38-in kumin April 8&9 khan exam beiin, mi 32 chu personal interview tura koh an ni. Heng mite atangin mi 4 thlan chhuah an ni a, May 8 khan appointment pek an ni tawh.
Hna lak diklo sawi tur a awm fo thin chu pawi a tih thu MZP hian a sawi a. Hna lakah a thiam leh tlingte lak thin nise, tih chu MZP duh dan a la ni reng a. Zirlai hna zawng mekte thlavang hauhin hma a la zel dawn tih a sawi a ni.