ZPM sawrkarin civil aviation lamah a ngaihna thlawt hre lo – Wg Cdr. J Lalhmingliana

ZPM sawrkarin civil aviation
lamah a ngaihna thlawt hre lo
– Wg Cdr. J Lalhmingliana
ZPM sawrkarin civil aviation lamah a ngaihna thlawt a hre loa, than belh a beisei awm loh tih Civil Aviation principal consultant hlui, wing commander J Lalhmingliana chuan a sawi.
Thawhtannia MNF office Mizo Hnam Run inkhawmah MNF adviser ni bawk Wg. Cdr. J Lalhmingliana chuan, Air Force-a kum 23 a thawh tawha a tawnhriat atangin Indian Air Force kuta Lengpui Airport hlan tum chu thil tih chi a ni loa, airport chu intawm chi a ni lo tih a sawi.
“Air Force leh civil flying a inpawlhna reng rengah civil an insawn chhuak zel a. IAF kuta airport kan hlan chuan, kumkhuaa kan inchhirna tur a ni ang. Ralthuam famkim nena inthuam, hman phalna nei bawk si nena thil intawm chu tih chi a ni loa, a zirchiangtute hian an zirchiang lo a ni,” a ti.
Lengpui Airport bul tantu tak chief minister hlui Laldenga a ni tih J Lalhmingliana hian a sawi a. MNF sawrkar lai, kum 1987-a Survey Team a din atanga intan niin, amah chu Team leader-ah CM hian a dah nghe nghe tih a sawi.
“Hemi tum hian thla 6 chhunga report pe tur kan ni a, Lunglei Kawmzawl pawh kan en nghal a ni. Pu Laldenga khan Rajiv Gandhi (PM) hnenah Mizoram-in airport thar kan neih theihnan nasa takin a sawi a. DO letter a ziak a, hmuh tul ang ang minister dangte a dawr bawk. Chumi kalzelah kum 1991 khan airport survey turte an lokal kal ta a ni,” a ti.
Lengpui Airport chu kum 1995-ah sak tan theihin sum a awm a, 1996-ah sak tan niin, 1998 December 12-ah MNF sawrkar hnuaia hawn a ni MNF adviser hian a sawi a. A bul tantu MNF hunlai bawkin hawn a ni tih a sawi.