Rualbanlote tan sawrkar hmun hma ruahman a nih dan enfiah

Rualbanlote tan sawrkar hmun
hma ruahman a nih dan enfiah
State commissioner for Persons with Disabilities (PwD) Mizoram Vanlaldiki Sailo chuan Lawngtlai district-a hmun pawimawh thenkhatah pianphunga rualbanlote awlsam zawkin an lut chhuakin an dawr thei em, tih a enfiah.
‘Accessibility India Campaign’ hnuaiah rualbanlote thlen/ pan theih lohna a awm em, tih zirchiang tura kal a ni tih PwD commissioner hian a sawi a. All India Campaign a nih angin, state hrang hrangah hma lak mek a ni a, Mizoramah pawh bawhzui mek a ni tih a sawi.
“Zirna in leh sawrkar building zawng zawng chu rualbanlote tana thlen phak a ni tur a ni a, inthiarna/ inbualna ah rualbanlote hman tur bik siam a tul hle,” a ti.
India sawrkarin rualbanlote a ngaipawimawh hle a, sawrkar hun pawimawh leh thiltih kalphung engkim an hriat ve theihna turin interpreter (sign language thiamte) a hmang uar tawh hle tih Vanlaldiki Sailo hian a sawi a. Mizoram sawrkar pawhin sign language thiamte a hmang tangkai tan mek tih a sawi a ni.
PwD commissioner hi sub deputy commissioner Dr Saithantluangi Zote bakah a kaihhnawih sawrkar aiawhten an tawiawm a. Bawrhsap pisa, LADC office, District Hospital, Govt Region Higher Secondary School leh Govt Lawngtlai College chu rualbanlote tana thlen phak leh awlsam zawka dawr theih an nih leh nih loh a enfiah a ni.