Nov, 2026 atangin Delhi-ah tuialhthei bawlhhlawh hmang bus lut thei dawn lo

Nov, 2026 atangin Delhi-ah tuialhthei bawlhhlawh hmang bus lut thei dawn lo
November 1, 2026 atang chuan India khawpui ber, Delhi-ah boruak tibawlhhlawh thei lo chi, CNG emaw, electricity emaw leh BS-VI diesel hmang emaw an nih loh chuan bus-te an lut thei tawh dawn lo va, he khapna hi Nilaini khan Commission for Air Quality Management (CAQM)-in a tichhuak.
He thupek hian Delhi-a lut thin bus zawng zawng – All India Tourist Permit hnuaia mi te, contract carriage te, zirna leh sikul atana phalna neite pawh a huam vek dawn a. Delhi-a inziak lut bikte chauh a huam lo vang.
Mi thiamte chuan state dang atanga bus hlui leh boruak tibawlhhlawh thei chi tui la hmang bus lut thinten Delhi-a boruak hi an tibawlhhlawh nasa em em niin an sawi a. Tunah hian khawpuia inziak lut bus-te hi an tuialhthei hman a thianghlim tlangpui tawh a, a tibawlhhlawhtu ber chu state pawn atanga boruak tibawlhhlawh thei tuialhthei la hmangte an ni deuh ber tawh.
Commission hian state thenkhat – Haryana, Uttar Pradesh, Rajasthan, Punjab, Himachal Pradesh, Uttarakhand, Madhya Pradesh leh Jammu & Kashmir te chu kum 2024 laihawiah emaw, a lo berah kum 2025 kum tir lamah tal boruak tibawlhhlawh thei lo tuialhthei hmang bus hmang tawh turin a lo ti tawh a; mahse, hei hi an la tihlawhtlin hlawm chiah lo.
“November 1, 2026 atang chuan CNG, electric emaw BS VI diesel bus emaw chauh Delhi-ah luh phal a ni tawh ang,” tiin CAQM chuan thu a chhuah.
Delhi-a transport department leh traffic police-te pawh he thupek hi khauh taka kengkawh turin a hriattir nghal a, ramri luhnaah automatic number plate recognition system leh RFID bun veka lut tur veng turin a ti a ni.
State dang sorkarte pawh bus neitu leh company-te hnenah he inkaihhruaina thar hman tur hi a hma lama hrilh lawk turin a ti bawk.
India khawpui hi kum tin thlasik lai, October/November thlaa Hindu kûtpui, Diwali-a halmawi an hal vak atanga intanin February vel thleng boruak a bawlhhlawh em em ziah a. Mihring hriselnain a tuar a, boruak tihbawlhhlawh a nih lohna turin khuahkhirhna leh kaihhruaina hrang hrang siam a lo ni tawh thin a ni.