Kum danga chawlh hunah pawh Naxal beih chawlhsan dawn lo

Kum danga chawlh hunah pawh Naxal beih chawlhsan dawn lo
Hun danga fur laia Naxal helho beih chawlhsan thin chu kuminah chuan kalpui reng a ni dawn tih Union Home Minister Amit Shah-a’n a sawi a. March 31, 2026-a Left-Wing Extremism tihreh tumna chu chak taka kalpui a ni zel dawn tih a sawi.
Raipur, Chhattisgarh-a National Forensic Science University (NFSU) campus leh Central Forensic Science Laboratory (CFSL) dinna tur Pathiannia lung a phumnaah Shah chuan Maoist nena indawr tum a nih loh thu leh inpea ram kalphung ang zawm ve zawk turin a ti.
“Kuminah hian Maoist-te hi furah pawh kan chawlh hahdamtir dawn lo va. March 31, 2026-a nuai chimih vek kan tumna kawng hi kan zawh zel dawn,” a ti.
Shah-ah hian nikum January atang khan Chhattisgarh-ah hian Maoist 400 chuang thah an ni tawh tih a sawi a, heng zingah hian an hruaitu lawk, Basavaraju tia an koh, Nambala Keshav Rao pawh telin ani hi May thlaa Bastar-a kah hlum niin dan pawna dah, CPI (Maoist) general secretary ni lai a ni.
Maoist-te hnenah Shah chuan, “Inbiak a tulna a awm lo. In ralthuam dah ula, hmasawnna kawng hi rawn zawh ve rawh u. Inpete chu sorkar laipui leh state sorkarin chhawmdawlna pek kan tiam a ni,” a ti.
Shah-a’n a lung a phum tak, Nava Raipur-a NFSU campus hi Rs. vaibelchhe 145 senga siam tur niin CFSL Hi Rs. vaibelchhe 123 senna tur a ni a, kum thum chhunga sak zawh tur a ni.
Chhattisgarh-a Shah-a’n hun a hman mek lai hian Pathianni khan Maoist-te chuan Bijapur district-ah thingtlang khaw mi pahnih an thah niin police-in an sawi.
Mi thahte hi Sendrabor leh Aempur khuaa mite niin Bijapur district chhim lamah a ni a, heng lai hmun hi Maoist chet tamna lai a ni.
Pathiannia hriat ni mah se heng inthahna hi engtika thleng chiah nge hriat a ni lo tih police chuan an sawi a, a kimchang hriat tumin an chhui zui mek.
Tun tuma thil thleng hi tun hnaia Bijapur-a hetiang a thlen vawi hnihna a ni a. June 17 khan mipa naupang kum 13 mi telin mi pathum chu Peddakorma khuaah phuar beha tihhlum an lo ni tawh a. Police chuan heng mite hi March thlaa thuneitute hnenah inpe Maoist commander Dinesh Modiyam-a chhungte niin an sawi.