Kolasib-Sairang kawng siamnaahhma hruai turin sawrkar an beisei

Kolasib-Sairang kawng siamnaah
hma hruai turin sawrkar an beisei
Mizoram tana kawng pawimawh, National Highway 306 & 06 chhia siam kawngah Mizoram sawrkar chu hmahruaitu ni tura an beisei thu pawl pali intelkhawm chuan an sawi.
Mizoram Transformation Movement (MTM), Centre For Environment And Social Justice (CESJ), Mizoram First (MF) leh Citizen Alliance For Truth And Justice (CATAJ) ten Aizawla thuthar thehdarhtute an kawmnaah Mizoram kawngpui pawimawh, Kolasib atanga Sairang inkar zawh hleihtheih loh khawpa chhia avanga lirthei tlu leh tang thin, state mamawh lak theih loh khawpa a awm chuan an rilru a ti hle tih an sawi.
Kumin June 30-ah PWD minister-in helai kawng chhia siamthat hi Mizoram PWD mawhphurhna niloin sawi mah se, NH 06 package 8 (Kawnpui to Khamrang) chu tun thlengin PWD enkawl a ni a, mipui rilru hruaikawi thei thudik ziktluak lo sawiah an ngai tih an sawi a ni.
“He kawng pawimawh tak hi tu enkawlna hnuaiah pawh awm se, ram neitu Mizoram sawrkar mawhphurhna niin kan hria a. Mizoram Tipper Association mangang pawhin siam tura hma an lak ngam chuan, sawrkar meuh chu mawhphurhnaa la a, hma hruai turin kan beisei a. Kawng siamna tur boulder tlemte chauh thawhchhuah pui mai loin, hmanraw tha ber ber nena thawk chhuak turin kan beisei a ni,” an ti.
Sawrkarin rang taka hma a la lo a nih chuan hnatlanga mipui thawhchhuah a ngai mai dawn niin, hetiang ngai lo turin sawrkarin hna thawk nghal turin an beisei tih an sawi bawk.