Dhaka sikula air force thlawhna tlaah mi 19 thi
Dhaka sikula air force thlawhna tlaah mi 19 thi
An khawpui, Dhaka-a sikul hung chhunga Bangladeshi air force training jet tlaah mi 19 vel an thi a, mi 164-in hliam an tuar bawk.
Khawpui hmar lam dai, Uttara-a Milestone School & College atanga video darhah chuan in chhawng hnih chunga thlawhna a tlak hnuah hian a kang nasa hle a a khu nasa hle bawk tih a lang.
Sipaiin Facebook-a thuchhuah an siamah F-7 thlawhna hi training excercise-a chhun dar 01:00 (India-a chhun dar 01:30)-a thlawh chhuah hnu lawkah khawl fel lo zuiin a tla a. A khalhtu pawh a thi tih an tar lang.
National Institute of Burn & Plastic Surgery-a doctor chuan naupang telin mi 50 chuang kang vangin damdawi inah dah an ni tih a sawi.
Sikula zirlaite hi kum li leh 18 inkar an ni.
College-a zirtirtu, Rezaul Islam chuan thlawhna hian chiang takin in hi a su niin BBC Bangla a hrilh.
Zirtirtu dang, Masud Tarik chuan ring taka puak a hriat thu Reuters a hrilh a, “Hnung lam ka haw chuan mei leh khu ka hmu a, nu leh pa leh naupang tam tak an awm a ni,” a ti.
Zirlai pakhat chuan a hmuh chian hle laiin thlawhna chuan an sikul a su tih a sawi.
Thlawhna khalhtu, Flight Lieutenant Md. Taukir Islam-a hian a khawl a buai hnuah hian mihring tam lohna lam tur a pan tang tang niin sipai thuchhuah chuan a tar lang a. Khawpuia air force base atanga a thlawh chhuah hnu lawkah a buai zui ta tih an sawi.
Hliam tuarte hi a bul hnai damdawi inah lak an ni a, emergency team-in chhanchhuah hna an thawk nghal a. Chetsualna thleng chhuitu tur committee din nghal a ni bawk tih an sawi.
Thlalak darhah chuan emergency service-a thawkte chuan in chhe nawi karah dam chhuak an zawng a, mipui tam takin a bul in chung zawl atangin an thlir thup bawk.
An ram sorkar lailawka an hruaitu, Muhammad Yunus-a chuan chetsualna thleng chu a chhan ‘chhui chhuah ngei’ a tul thu leh a tuartute puihna pawh pek an nih tur thu a sawi.
“Ram tan a lungchhiatthlak a. Hliam tuarte rang taka dam leh turin ka duhsak a, damdawi in telin thuneitute pawhin ngai pawimawh se tih ka hrilh bawk,” tiin X-ah a tar lang.
Bangladesh chuan Thawhlehni khan sunna ni atan a puang a, an ram puanzar chu a ngul chanvea zar a ni.