Vice President ban hnuah Session kan chhunzawm: K Vena

On Jul 25, 2025 9 0

Vice President ban hnuah Session kan chhunzawm: K Vena
Thawhtanni khan India ram vice president Jagdeep Dhankar a bang a, India vice president hi Rajya Sabha chairman a ni. Rajya Sabha-a Mizoram MP K Vanlalvena chuan an chairman a ban hnuah deputy chairman kaihhruaiin session an chhunzawm thu a sawi.
“Deputy chairman-in session a kaihruai a, ani bakah panel of chairman an awm a, deputy chairman hi an chhawk zawk zawk bawk a. Session chu a kal reng,” tiin The Aizawl Post a hrilh.
Inauh buai a awm zui thu a sawi a, Ningani pawh khan rorel inkhawm an tan deuh chiah tihah an inauh buai avangin house an adjourn thu a sawi. Amaherawhchu, Rajya Sabha-ah hian an chairman, India ram vice president ban chungchang khel zui a awm loh thu a sawi a, BJP lam erawh a chungah hian an lawm lo tih a lan thu a sawi.
K Vena sawi danin, Thawhtanni khan chawhma dar 11-ah session an tan a, Zero Hour an tan tihah opposition MP 63-in High Court Justice Yashwant Varma ban phutna impeachment motion an pulut a, Operation Sindhoor chungchang sawi phuta au an awm, electoral roll revision chungchang sawi phut an awm bawk. Chhun dar 12-a tan leh turin House an adjourn ta a, dar 12-a an tan leh pawhin an inauh buai leh nghal avangin house an adjourn leh.
High Court Justice Yashwant Varma ban tura phutna Impeachment Motion chungchang chu sawi ho turin dar 12.30-ah Rajya Sabha chairman chuan Business Advisory Board thutkhawm a ko a, chawhnu dar 2-ah Session chhunzawm leh a niin, chairman chu lo ding chhuakin, ‘High Court Justice Yashwant Varma impeachment motion notice MP 63-te hnen atangin ka dawng a,’ tiin a sawi a, inau bengchheng karah hun engemaw an sawi ho hman.
A sawi zel danin, chairman an inthlak a, chairman chu hahchawl turin a room-ah a lut a, union health minister, BJP national president ni bawk, Rajya Sabha House Leader ni bawk JP Nadda leh parliamentary affairs minister Kiren Rijiju, Lok Sabha MP te pahnihin Rajya Sabha chairman chu an va hmu a, Rajya Sabha-ah Justice Varma impeachment motion a pawm mai chu hriatthiam harsa an tih thu te, Lok Sabha-ah dan pangngaia kalpui tura inbuatsaih a nih mek laia Opposition MP-te ngenna pawma Rajya Sabha session-a pharh a ni chu prime minister pawh a lungawi loh thu an hrilh a ni.
Rajya Sabha chairman (vice president) chuan dan ang thlapa Business Advisory Committee kaltlanga tih a ni tiin a lo chhang a, tlai lam dar 4.30-ah Rajya Sabha chairman chuan Business Advisory Committee a ko nawn leh a, union minister pahnih JP Nada leh Kiren Rijiju te chu an tel duh ta lo a ni. Chumi tlai khaw thim hmain Rajya Sabha chairman, vice president Jagdeep Dhankar chuan a hrisel lohna chhuanlamin India president hnenah vice president a nihna atanga banna a thehlut ta a ni.