Damdawi in tha ho zingahMizoram-a PHC 4 lan belh

Damdawi in tha ho zingah
Mizoram-a PHC 4 lan belh
India rama sawrkar damdawi in tha bik tehnaah Mizorama primary health centre pali – South Vanlaiphai PHC, Sairang PHC, Bunghmun South PHC leh Kawrtethawveng PHC an tel thar.
National Health Mission Mizoram mission director Dr Lily Chhakchhuak sawi danin, India rama sawrkar damdawi in tha bik tehna, National Quality Assurance Standards (NQAS)-ah South Vanlaiphai PHC hian 93.07%, Sairang PHC 94.64%, Bunghmun South PHC 93.21% leh Kawrtethawveng PHC-in 92.44% an hmu a. Mizorama PHC zingah NQAS national certificate hmu hi 26 an awm ta a ni.
Heti hian Mizorama sawrkar damdawi in, PHC leh a chunglam 36-in NQAS national certificate an nei tawh a. Tunah hian sawrkar damdawi in 21-in state level certificate nei tawhin national certificate result nghak mek 4 an awm.
Health & Family Welfare minister Lalrinpuii chuan, India rama damdawi in tha bik thlan zingah Mizorama damdawi in an awm belh zel chu state tan mellung pawimawh a ni, tiin, district leh state-a thawktute thawhrimna chhuanawm a tih thu a sawi a ni.