Gaza indonaah mi 60,000 chuang thi ta

Israeli sipaiten October, 2023 atanga Gaza-a beihpui an thlak atangin mi 60,000 chuang an thi tawh niin Hamas hnuaia health ministry-in a sawi.
Thawhtanni khan thi zat hi 60,034 vel an ni tawh a, naupang 18,592 leh hmeichhia 9,782 an tel.
Thawhlehni tuk atanga chhiar leta darkar 24 chhungin mi 112 thah an ni leh hman a, heng zinga 22 hi puihna dawn tumte an ni tih ministry chuan a sawi.
Zan leh zing lama chenna in beihnaah hmeichhia leh naupang pawh an thi teuh niin damdawi in leh thil thleng hmututen an sawi bawk.
Israel chuan Hamas health ministry-in thi zat an sawi chungchangah Palestinian hel pawl engzat nge tel tih an zawt.
Sipaite hian kumin kum tir khan indo tawh chhungin Hamas leh Palestinian Islamic Jihad pawla tel mi 20,000 an thah tawh thu an sawi a. July thla tir khan chief of staff pawhin ‘tun hnai maiah pawh ‘mi firfiak’ 1,300 chuang an thah tih a sawi.
Israel hian Gaza-ah ram dang chanchinbumi an luh a phalsak lo va, hei vang hian khawi lam ve ve pawhin an sawi hi finfiah theih a ni lo.
Tun hma lamah erawh health ministry hi buaina a awma thi leh a tuartu zat sawi nan UN leh pawl dangten an rin ber a ni thin.
Israel hian Hamas-in October 7, 2023-a Israel chhim lam beia mi 1,200 chuang an thah leh hren tura mi 251 an hruai phuba lain Gaza hi a bei a ni.
UN chuan May 27 atang khan Israeli sipaten ei tur sem dawn tuma kal Palestinian 1,000 chuang an that tawh tih an sawi a. A tam ber hi Israeli leh US thlawp pawl, Gaza Humanitarian Foundation (GHF)-in puihna an semna bulah niin an pawl hian May thla tawp atang khan puihna sem hna hi an thawk tan a. Mi thah dangte hi UN hmun bul hnai leh puihna phurtute bulah a ni.
GHF chuan UN hian Hamas health ministry atangin a zat ‘dik lo’ an dawng niin an sawi ve thung.
UN-in a thlawp khawvel huapa ei tur buaipuite chuan Gaza-ah hian tam a tla nasa tih an sawi a. Israel erawh chuan mihring manganna thlengah hian Gaza luhna an dan vang ni lovah an puh a, Europe-a an thawhpui, UN leh agancy dangte erawh chuan an pawmpui lo.
Pathianni khan Gaza-a luhna thununtu, Israel chuan ni khatah darkar 10 chhung zel mihring puihna luh theihna hun an hawng dawn tih an puang a, puihna lutte chu ‘kawng zawh tur bik an siamah’ zel kalpui turin an ti.
Sipai chetna chawlhsan hun hi chawhma dar 10:00 atanga zan dar 08:00 inkarah hmun thumah kalpui niin zan lamah erawh zankhuain thlawhna atangin an bei chhunzawm thei reng.
Israel hian ram dangten thlawhna atanga puihna thlak pawh an phalsak a, hei hi mihring dikna chanvo humhalhtu tam tak chuan thil sawi lo leh hlauhawm niin an sawi.