Covid-19 vei hriat belh leh
Covid-19 a hluar lem lo a, mahse a vei chu an awm ve deuh reng. Tun hnaiah pawh an awm zeuh zeuh a, Mizoramah he hri vanga enkawl paruk an awm mek.
Thla a thar a, a ni khatnaah covid vei hriat thar mi panga an awm. IDSP, health & family welfare department-in August ni 1-a an puan danin, hri vei hriat thar mi panga an awm a, pakhat enkawl sa nen, mi paruk enkawl mek an ni.
Hri vei hriat thar mi pangate hi Aizawl district mi vek, naupang vek an ni a, thu dawn danin, natna dang vanga damdawi ina enkawl lai, rinhlelh thila endik an ni.
August ni 1-a result chhuakah hian mi pasarih endik an ni a, pahnih chuan hri an lo vei lo.
Integrated Disease Surveillance Programme (IDSP) chhinchhiah danin, August ni 1 thlengin Covid-19 vei mi 19 hriatchhuah an ni tawh a, mi 13 chu damin an chhuak tawh. Na tak an awm lo a, a tam zawk chu natna dang vanga enkawl sa, fimkhur thua endik an ni. A vei zingah hian an chhungte’n an vei avanga endik pahnih khat an awm tih thu dawn a ni.
Covid-19 hi kum dangah pawh ruah sur tirh vel atangin a hluar thin an ti a, kuminah pawh hri vei hriat hmasak ber chu May ni 30-a mi a ni.
May thla tawp atangin, June, July leh August ni hmasa berah hri vei hriatchhuah an awm zeuh zeuh a, mahse IDSP hotute chuan kum dang nena khaikhinin Mizoramah he hri hi a nasa lo an ti.
Mizoramah 2020 atangin sample 19,97,863 endik a ni tawh a, chung zingah chuan 2,39,654 chu a positive a ni.