Kristianpuite thlavang hauhaauchhuak turin hruaitute phut
Mizoram sawrkar hotute leh BJP Mizoram hruaitu chu Kerala Nun pahnih thlavang hauha auchhuak ve turin Congress hruaitu Lal Thanzara chuan a ngen.
Zirtawpnia Congress Bhavan-a inkhawmah MPCC president Lal Thanzara hian Kerala-a rawngbawltu, Nun pahnih chu Chhattisgarh-ah BJP firfiakten dawtin Kristiana inleh luihtir tum angin an puh bakah mihring rukbo tum angin an puh a. Congress hruaitu KC Venugopal, Saleng A Sangma leh Priyanka Gandhi te an thlavang hauha an auchhuah laiin, Mizoram chief minister leh MP pahnih chu heng rawngbawltute thlavang hauh hian an auchhuak ve lo tih a sawi.
“Ring lo mite zawkin an thlavang an hauh lai a, keini kan ngawi reng hi a pawi takzet. Kei pawhin he thil thkeng hi vanduaithlak ka ti a, ka demin, nun pahnih hi chhuah turin ka ngen a ni,” a ti.
BJP Mizoram president Dr K Beichhua pawh kohhran upa a ni a, hetiang hunah hian a ngawi leh hlauh si, tia sawiin, an lalna leh hun tha an neih laia an auchhuah a tul tih a sawi a ni.
Chief minister hlui Pu Lal Thanhawla kha rawngbawlna lamah a chek thuk thu hriat ni lo mah se, Kristiante tawrhna a thlenin, rawngbawltute thlavang hauhin a auchhuak thin tih MPCC president hian a sawi a. India President leh Prime minister hnenah lehkha ziakin hma a la thin a. India rama kan Kristianpuiten an thlamuanpui hle thin tih a sawi.
“Hotu leh nihna kan chan hi kan sakhua kan humhalh a, chhan an ngaih huna kan chhan hun tak tur chu a ni dawn lo’m ni. Kan politics khelhnaah pawh kan ram, kan hnam, kan sakhua a him em, kan party awmnaah hian a him em, tih ngaihtuah a ngai,” a ti.
Kristian missionary-ten missionary pawh inti ngamlo khawpa hun an hman mek karah pawh ringtu zaa zaa inchhal ram chu kan harhchhuak lo a nih chuan kan chan tur chu ngaihtuahawm tak a ni tih a sawi a. Enchhin sawrkar hian BJP president Dr Beichhua chu deputy chief minister-ah dah se chuan BJP sawrkar lei malsawmna tam tak dawn phah ngei dawn mah ila, thlarau malsawmna kan dawng angem, tih erawh kan ngaihtuah a ngai hle tih a sawi a ni.