Inkahhai hnua a vawi khat nan Thailand leh Cambodia inbia

Ramria ni nga chhung an indo hnu leh mi eng emaw zat thia mi 2,60,000 chuangin an in leh lo an chhuahsan hnua inkahhai an puan hnuah Thawhtanni khan Thai leh Cambodian thuneitute chu Malaysia-ah a thawh khat nan an inbia.
Ni li awh General Border Committee thutkhawm hi Cambodia-in a thlen tur ni mah se lehlam lehlam hian ram danga tih an duh ve ve avangin Association of Southeast Asian Nations (Asean) chairman nihna chelh mektu, Malaysia-in a thleng a ni.
July 28 khan US President Donald Trump-a’n sumdawnnaa inremna a la siampui loh ramte hi indo a tawp phawt loh chuan inremna siam lohpuiah a vau va. Inkahhai a awm hnuah Washington hian August 1 atang khan tariff a laksak thin pawh 36% atangin 19%-ah a tihhniamsak zui.
Thawhtannia inbiaknaah hian intihbuaina a chhuah tawh lohna tur an ruahman a. Kum tam tak chhung ramri hrula an inchuh ram chungchang an sawi lem lo.
Thailand leh Cambodia hi France-in a awp laia ramri a then hnu, kum 100 chuang liam tawh atanga intibuai an ni a. Kum 1962 khan International Court of Justice (ICJ) chuan Cambodia hnenah hmun hlui, Preah Vihear temple awmna a pe a, he lai hi an inchuh nasat lai ber niin hmun dang pawh an rama chhal ve ve an nei.
Kum 2011 khan Preah Vihaer-ah hian an lo indo tawh a, hemi hnuah kum 2013 khan ICJ chuan a thutlukna hmasa nemnghet nawnin Thailand a lawm lo hle.
May thla khan ram inchuhna hmun pakhata intihbuainaah Cambodian sipai kah hlum a ni a, an inkar khiin sumdawnna thila an inpawhna tam tak an titawp ve ve nghal.
Thla hmasa khan ram buai laia chilpuah bomb puakah Thai sipaiten hliam an tuar a, Thailand chuan Cambodia tihah a puh a, an inkar khik zual phahin silai pawh a puak zui ta a ni.
Inbiaknaah hian kal zel dan tur kimchang tak duan a nih beisei niin ASEAN monitoring team, Malaysian Chief of Defense Forces Gen. Mohamad Nizam Jaffar chuan a sawi.
Inkahhai puan a nih hnuah silai puak awm leh nia sawi awm mah se Nizam-a chuan tharum thawhna a reh tawh a, Thawhtannia inbiaknaah pawh inkahhai kalpui zel ni se an ti tih a sawi.
Ningani hian General Border Committee thutkhawm pui ber neih tur niin Thai Deputy Defense Minister Gen. Natthaphon Nakpanit leh Cambodian Deputy Prime Minister cum Defense Minister Tea Seih ten an kaihruai dun ang a, Malaysia, US leh China aiawh an tel bawk ang.