MSPMC-in hna endik dan thlirlet

Mizoram State Project Monitoring Committee (MSPMC) chu an chairman, chief minister Lalduhoma kaihhruaiin Thawhtanni khan a tum 6-na atan an thukhawm.
MSPMC hnuaia team hrang hrang an thawkrim tih a hriat thu chief minister hian a sawi a. General Body Meeting-a report an thlirho atang mai pawh hian an inpekzia a lang, tiin, tun tuma project 18 an endikna sawihoin annual report siam a ni dawn tih a sawi a ni.
Kumin April atanga August kal mek thlengin project 18 bawhzuiin, an hmunhma tlawha an thil hmuhchhuah report leh an rawtna sawi a nih bakah bawhzui zel dan tur ruahman a ni.
Department 28 hnuaia thawh tur hna (projects) thar 138, endik leh tur chi an lakhawm leh tawh a. Project data lakkhawm tur dang pawh a la awm niin an sawi. Heng project thar thawh hmabak an lakkhawm 138 hi chu hna an thawh tan phat atanga engkim an enpui theih tawh dawn avangin MSPMC endik hna hi a tangkai lehzual dawn nia ngaih a ni.
An endik tawh ho Annual Report 2024- 2025 siam turin an inpuahchah mek bawk.
Project kalpui dan tur tha zawk nia an ngaih, rawtna an neih an sawi hoa, an rawtna hi a kaihhnawih department-ah thlen a ni ang.