Taylor Swift album thar tur ‘The Life of a Showgirl’

Taylor Swift chuan New Heights podcast a a inlanna promo clip-ah “Chuan maw, thil te te entir che u ka duh a. Hei hi ka album thar a ni, The Life of a Showgirl” a ti.
‘The Life of a Showgirl’ hi Swift studio album 12-na tur a ni a, tunah hian pre-order vinyl, CD leh cassette edition atan an hawng tawh a, a tlangzarh hun tur hi official-a puan a la awm lo mah se October ni 13 atangin an hralh chhuak tan dawn niin report a awm.
New Heights podcast hi Swift-i bialpa Travis Kelce leh a unaupa, NFL star ve bawk Jason Kelce ten an host a ni a, Thawhtanni khan “khual duhawm tak’ an episode thar, Nilaini a chhuak turah an neih thu an puang a, an khual duhawm sawi hi Swift a ni tih rinzawn theih turin teaser an nei bawk. He teaser clip hi Swift leh New Heights Instagram account-ah te pawh an tarchhuak ve ve a ni.
Swift studio album 11-na “The Tortured Poets Department’ kha April 2024-a tlangzarh niin, Billboard 200 (albums) chart-ah kar 17 a No.1 thei a, Taylor Swift album zinga he chart-a No.1 ni rei thei ber a la ni. He album hi Grammy album of the year-ah nominate a ni a, Swift tan he category-a nomination pasarih a neihna niin, hmeichhe zaithiam zinga he category-a nomination ngah ber a ni bawk.