IMF ten Sri Lanka 3 billion-in bailout ta

Sri Lanka chuan independence a nih hnua sum lama harsatna turu ber a tawn hnuah $3 billion in International Monetary Fund (IMF) chuan a bailout ta.
Kum khat dawn inremna siam a nih theih nana inbiakna kalpui a nih hnuah thutlukna siamfel theih ni ta in Sri Lanka hian loan angin dollar billion tel hi a la thei dawn ta a ni.
Foreign Minister Ali Sabry chuan state-owned enterprise te siam thain leh national airlines privatise in sum hmuh a tum dawn tiin a sawi a.
Mahse, analysts te chuan Sri Lanka chuan hma lam hun khirh tak a hmachhawn dawn an ti thung a. Sri Lanka economy hi pandemic, energy man sang, populist tax cut leh inflation 50% chuang vangin a talbuai hle a ni.
Nikum May thla khan Sri Lanka chuan a leiba rul thei lova awm tawhin a history-ah a tum khatna a ni a.
“Kan theih bak piah lamin kan nung a. Kan duh emaw duh lo emaw kan ngainat loh tak pawh ni mahse thutlukna siam a ngai a ni,” tiin Sabry chuan a sawi a.
“Vanneihtlak takin mi tam ber te politics thila pawrte tih loh chuan an hrethiam em em vek a. |henkhatte chu an hlim lo tih kan hria a, mahse, duhhtlan tur dang kan nei chuang lo,” tiin Sabry chuan a sawi.
Kumin kumtir lam khan professional tax 12.5% atangin 36% ah a la sang tawh bawk a, ni tin mamawh heng fuel leh food angah te pawh tax a la sang bawk.
Chu chu kum 2019-a khatih laia Sri Lanka president Gotabaya Rajapaksa an tax cut turu tak a kalpui a, sorkarin kumkhata $1.4 billion vel a hloh nen chuan inang lo tak a ni.
S&P Global Rating agency analyst Andrew Wood chuan, “Sri Lanka chuan sorkar balance sheet mumal zawk awm nan, economic growth mumal awm nan leh external stability awm theih nan hma hun thui tak a la nei,” tiin a sawi a.
“Kum 2023-ah hian economy chu a tawm tê ngei turah kan ngai a, kum 2024-ah chuan tlemte talin hmasawnna erawh a awm ang,” tiin a sawi.
IMF te nena Sir Lanka-in inremna an siam theih hmain Sri Lanka-in sum a puk nasatna China leh India te chuan remtihna an pek a ngai a, ram pahnih te hian remtihna an pek hnuah bailout hi kalpui theih chauh a ni.
China hi Sri Lanka-in leiba a neih tamna ber niin tun thlengin ngenna awm mah se, China chuan Sri Lanka leiba chu ngaihdam sak tumna emaw a la nei lo thung a.
“Kan leiba te kan rulh ngei a ngai a, tunah erawh leiba rul turin sum kan nei lo. Tuna kan tum ber chu leiba rul thei tura chetlak a ni” tiin a sawi a, “Thil awlai lo leh khirh tak tur a la ni zel a ni,” tiin a sawi.
Sri Lanka sorkar chuan leiba a rulh dan turah China leh India te nen kum 2022 khan inremna an siam theih a beisei laiin tun thlengin inremna mumal siam a la ni lo thung a. Beijing laka a leibat chu $7 billion vel laia chhut a nih laiin India laka a leiba chu $ 1 billion vel nia ngaih a ni.